ދިވެހި ރައްޔިތުން ބީއެމްއެލްގެ އޭޓީއެމް ތަކުން ޑޮލަރު ނަގާއިރު ލިބެނީ ”ކުނެވެފައިވާ ޑޮލަރު“ ކަމަށް ޕީއެންސީގެ ނައިބު ރައީސް އަދި ބާރަށު ދާއިރާގެ ކުރީގެ މަޖިލީސް މެމްބަރު އިބްރާހިމް ޝުޖާއު ވިދާޅުވެއްޖެއެވެ.
މިހާރު ރައްޔިތުންނަށް ބީއެމްއެލްގެ އޭޓީއެމަ ތަކުން ލިބެނީ ކުނި ޑޮލަރު ކަމަށާއި މިކަމަކީ ލަދިވެތިކަމެއް ކަމަށް އެމަނިކުފާނު ވަނީ ވިދާޅުވެފައެވެ. އަދި މިއަދު މިއޮތީ ސަރުކާރުގެ ހުރިހާ ކަމަކުން ވެސް ފޫވެއްޓިފައި ކަމަށާއި ވެރިކަން ކުރުމުގެ ނިޒާމުން ފެށިގެން ގޮސް ބަލާލި ކޮންމެ ދިމާލަކުންވެސް މުޅި ނިޒާމު ފެއިލް ވެފައިވާ މަންޒަރު ފެންނަކަމަށް އެމަނިކުފާނު ކުރެއްވި ޓުއީޓުގައި ވަނީ ފާހަގަ ކުރައްވާފައެވެ.
ޝުޖާއު މިފަދަ މޭރުމަކުން ވާހަކަ ފުޅުދައްކަވާފައި މިވަނީ ދާދި ފަހުން އޭޓީއެމް އިން ނެގި ޑޮލަރުތަކެއް ވީދި ހަލާކުވެފައި ވާކަމަށައި، އަދި މިހާރު ލިބެނީ ކުދި ނޫޓުތައް ކަމަށަބުނެ ރައްޔިތުން ޝަކުވާ ކުރަން ފަށާފައިވާ ދަނޑިވަޅެއްގައެވެ. އަދި ބައެއް ދުވަސް ތަކުގައި ޑޮލަރު އޭޓީއެމް ތަކުން ޑޮލަރު ނުލިބޭ ކަމަށާއި، މިހެން ވުމުގެ ސަބަބުން ކަޅުބާޒާރުން ޑޮލަރު ގަންނަން ޖެހިފައިވާކަމަށްވެސް މީހުން އަންނީ ބުނަމުންނެވެ.
އެހެން ނަމަވެސް މިކަމާއި ގުޅިގެން ގައުމީ ބޭންކުގެ ބަހެއް އަދިވަނީ ލިބޭ ގޮތް ނުވެފައެވެ.
ކޯވިޑް 19 ގެ ސަބަބުން ރާއްޖެއަށް ޑޮލަރު ލިބުން ދަތިވެ، ޑޮލަރުގެ ކަޅު ބާޒާރުގެ ވިޔަފާރި ވަނީ އިންތިހާއަށް ފުޅާވެފައެވެ. މީގެ ކުރިން ޑޮލަރެއްގެ އަގު 15.42 ގައި ހުރި އިރު މިހާރު ޑޮލަރެއް ގަންނަން ލިބެނީ 17.50 އާއި 19 ރުފިޔާއާއި ދެމެދުގެ އަގެއްގައެވެ.
