ރައީސް މައުމޫނުގެ ވެރިކަމުގައި ރާއްޖޭގެ ބޭއްވުނު ވޯޓުތަށް ވަނީ އޯލުވާލާފައި ކަމަށް ބުނެ މަޖިލީހުގެ ރައީސް މުހައްމަދު ނަޝީދު ކުރެއްވި ޓުއީޓަށް ރައީސް މައުމޫން ރައްދު ދެއްވާފިއެވެ.
ރައީސް ނަޝީދު ވިދާޅުވީ، ރައީސް މައުމޫންގެ ހަޔާތްޕުޅުގައި ބޭއްވުނު ކޮންމެ ވޯޓެއްގައިވެސް ރައީސް މައުމޫނު މަކަރުހައްވާ އޮޅުވާލާފައި ވާކަމަށާއި، 2007 ވަނަ އަހަރު ބޭއްވުނު ރާއްޖޭގެ ވެރިކަމުގެ ނިޒާމު އޮންނަންވީ ގޮތުގެ ވޯޓުވެސް އެމަނިކުފާނު އޮޅުވާލެއްވިކަމަށެވެ. އަދި ހަމައެކަނި އޮޅުވާނުލާ ކުރިއަށް ގެންދެވުނު ވޯޓުން ރައީސް މައުމޫނު ބަލިވެވަޑައިގަތީ ކަމަށާއި، އެއީ 2008 ވަނަ އަހަރުގެ ރިޔާސީ އިންތިހާބުގެ ވޯޓުކަމަށްވެސް ރާއްޖޭގެ ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް، މުހައްމަދު ނަޝީދުވަނީ ވިދާޅުވެފައެވެ.
ރައީސް ނަޝީދުގެ ޓުއީޓަށް ރައްދު ދެއްވަމުން ރައީސް މައުމޫން ވިދާޅުވީ، އެމަނިކުފާނު ހިތާމަކުރައްވަނީ، ބައެއް ބޭފުޅުން ދިވެހި ރައްޔިތުންނަކީ މޮޔައިންގެ ގޮތުގައި ދެކޭތީކަމަށާއި، 30 އަހަރު ދުވަހު ބޭއްވުނު ހުރިހާ އިންތިހާބެއް އޮޅުވާލިނަމަ 2008 ގެ ރިޔާސީ އިންތިހާބު އޮޅުވާ ނުލެވެންވީ ކީއްވެތޯ ވިދާޅުވެފައެވެ. އަދި މިކަމަށް ބުއްދި ގަބޫލު ކުރެވޭނެ ޖަވާބެއް ދިނުމަށްވެސް ރައީސް މައުމޫން ވަނީ އެމަނިކުފާނުގެ ޓުއީޓުގައި ވިދާޅުވެފައެވެ.
އިއްޔެގެ ވަގުތެއްގައި ރައީސް މައުމޫން ކުރެއްވި ޓުއީޓާއި ގުޅިގެން ގިނަބަޔެއްގެ ސަމާލުކަން ވަނީ ލިބިފައެވެ. އެމަނިކުފާނު ކުރެއްވި ޓުއީޓުގައި ވިދާޅުވީ، ދިވެހި ރާއްޖޭގެސިޔާސީ،އިޖްތިމާޢީ އަދި އިޤްތިޞާދީ ޙާލަތަށް ބަލާއިރު ރާއްޖެއަށް އެންމެ ކަމުދާ ވެރިކަމުގެ ނިޒާމަކީ ރިޔާސީ ނިޒާމު ކަން ކަށަވަރުވާކަމަށާއި، 2007 ވަނަ އަހަރު ރާއްޖޭގެ ރައްޔިތުންގެ ވަރަށް ބޮޑު އަޣްލަބިއްތަކުން އެކަން އެގޮތަށް ނިންމަވާފައިވާ ކަމަށެވެ.
ރައީސް ނަޝީދަކީ އަބަދުވެސް ރާއްޖޭގެ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމަށް ވަކާލާތު ކުރައްވަމުން ގެންދަވާ ބޭފުޅެކެވެ. އަދި މިހާރު އެމަނިކުފާނުގެ ޕާޓީއަށް މަޖިލީހުގެ ސުޕާރ މެޖޯރެޓީ ލިބިފައި އޮތުމުން ވެރިކަމުގެ ނިޒާމު އެމަނިކުފާނު ބޭނުންވާ ގޮތަށް ބަދަލުކުރުމަށް ފަސޭހަވެގެން ދާނެއެވެ.
އެހެން ނަމަވެސް ވެރިކަމުގެ ނިޒާމަކީ ދިވެހި ރައްޔިތުން 2007 ވަނަ އަހަރު ފެންނަ ނުފެންނަ ވޯޓަކުން ރިޔާސީ ނިޒާމަށް ފުރިހަމަ ތާއީދު ލިބި، އެގޮތުގެ މަތިން މިއަދާ ހަމަޔަށްވެސް ރާއްޖޭގެ ވެރިކަން ކުރަމުންދާ ނިޒާމެވެ. އަދި އެނިޒާމު ބަދަލު ކުރަންވެސް ޖެހޭނީ ރައްޔިތުންގެ ވޯޓަކުން ކަން ގިނަފަރާތް ތަކަކުން އަންނަނީ ބުނަމުންނެވެ.
