އަދިގެ ސަރުކާރުން ކޮރަޕްޝަނާއި ދެކޮޅަށް ގެންގުޅޭނެ ކަމަށް ވައުދުވި ޒީރޯ ޓޮލެރެންސް ސިޔާސަތު ފެނި ހައިރާން ވެއްޖެކަމަށް ރާއްޖޭގެ ކުރީގެ ނައިބު ރައީސް އަދި ރައީސް ޔާމީންގެ ގާނޫނީ ޓީމުގައި އިސްކޮށް ހަރަކާތްތެރިވާ ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
އޮޑިޓާރ ޖެނެރަލްގެ އޮފީހުން މީގެ ދުވަސްކޮޅެއް ކުރިން ނެރުނު ރިޕޯޓުގައި ހެލްތު މިނިސްޓްރީއިން ކޯވިޑް 19 ގެ ބަލި މީހުނަށް ފަރުވާ ދިނުމަށް ގެނައުމަށް ނިންމި ވެންޓިލޭޓަރު ތަކުގެ މައްސަލާގައި، ބޮޑެތި އޮޅުވާލުންތަކެއް އޮޅުވާލާ ކޮރަޕްޝަންގެ އަމަލު ހިންގާފައިވާކަމަށް ވަނީ ވިދާޅުވެފައެވެ. އެމައްސަލަ ފެންމަތިވުމުން ހެލްތު މިނިސްޓާރ އަބްދުﷲ އަމީން ވަނީ އަމިއްލަ ފުޅަށް މަގާމުގެ މައްސޫލިޔަތު އެކަހެރި ވެފައެވެ. ސަބަބަކީ އެމަނިކުފާނު ނުރަސްމީކޮށް އަމިއްލަ މަންފާ ހޯދުމަށް ޑަބްލިއުއެޗްއޯއާއި އެކު ސިއްރު އެއްބަސް ވުންތަކެއް ވިކަމަށް ރިޕޯޓޫގައި ތުހުމަތު ކުރެވުމުންނެވެ. އެހެން ނަމަވެސް މިއަދާއި ހަމަޔަށް ވެސް އެމައްސަލާގައި ޝާމިލުވާ އެއްވެސް ބޭފުޅަކު ހައްޔަރު ކޮށްފައި ނުވާކަން ފާހަގަ ކޮށްލެވެއެވެ.
މިކަމާއި ގުޅިގެން ޑރ. ޖަމީލް މިއަދު ކުރެއްވި ޓުއީޓެއްގައި ވިދާޅުވީ، 1 މިލިއަން ޑޮލަރުގެ ތުހުމަތު އަޅުވައިގެން އެހެން މީހުން ޖަލަށް ލެވޭ ކަމަށާއި، އެހެން ނަމަވެސް މިފަހަރު މިދަތި ދަނޑިވަޅުގައި އެތައް މިލިއަނެއްގެ ކޮރަޕްޝަން ހިންގި މީހުން އަދިވެސް ތިއްބެވީ މިނިވަން ކަންމަތީ ކަމަށް ވަނީ ވިދާޅުވެފައެވެ. އަދި ކިތައްމެ ބަހަނާއެއް ދެއްކިނަމަވެސް ހެލްތު މިނިސްޓްރީއިން ހިންގީ ކޮރަޕްޝަންގެ ބިޔަ ބޮޑު އަމަލެއް ކަމަށްވަނީ އެމަނިކުފާނުގެ ޓުއީޓުގައި ފާހަގަ ކުރައްވާފައެވެ.
މީގެ އިތުރުން އެމަނިކުފާނުގެ ޓުއީޓުގައި ވިދާޅުވެފައިވަނީ ރާއްޖޭގެ ރައްޔުތުންގެ މަޖިލީހުގެ އިތުރުން ތަހުގީގީ އިދާރާތަށްވެސް ވަނީ ކޮމްޕްރޮމައިޒް ވެފާ ކަމަށާއި، އަދި ހެލްތު ގެ މައްސަލާގައި ޖިނާއީ ތަހުގީގެއް ކުރާނަމަ ކަމުގައި ޝާމިލްވާ ފަރާތްތަކަށް ހެއްކަށް ނުފޫޒު ފޯރުވާ ހެކި ނައްތާލުމުގެ ފުރުސަތު ދިނީ ކީއްވެގެންތޯ އެމަނިކުފާނު ވަނީ ސުވާލު އުފައްދަވާފައެވެ.
ހެލްތު މިނިސްޓްރީގެ އޮޑިޓް ރިޕޯޓްގައި އެންމެ ބޮޑު ކަމަކަށް ފާހަގަވެގެން ދިޔައީ، ދުބާއީގެ ”އެގްޒެކިއުޓާރޒް ޖެނެރަލް ޓްރޭޑިންގް“ ކުންފުންޏާ ހަވާލުކޮށްގެން 75 ވެންޓިލޭޓަރު ގެނައުމުގައި މަކަރާއި ހީލާތް ހަދައި، މާލިއްޔަތު ގަވާއިދާ ހިލާފު އެތައް ކަމެއް ކޮށްފައިވުމެވެ.
އޮޑިޓް ރިޕޯޓްގައި ފާހަގަވެގެން ދިޔަ ހެލްތު މިނިސްޓްރީގެ ތެރޭގައި ހިނގި ކޮރަޕްޝަން ކަމަށް ބެލެވޭ އެ މައްސަލަތައް ތަހުގީޣު ކުރުމަށް އެންޓި ކޮރަޕްޝަން ކޮމިޝަން (އޭސީސީ) އަށާއި ފުލުހުންނަށް ރައީސް އިބްރާހިމް މުހައްމަދު ސޯލިހް ވަނީ އަންގަވައިފައެވެ.
