އިދިކޮޅު ކޯލިޝަނުން މިއަދުގެ ސަރުކާރުން ގައުމު ވިއްކާލަން އުޅޭ ކަމަށް ބުނެ ހަދަނީ ދޮގު ކަމަށާއި، އެކަމުގެ ސަބަބަކީ ވައްކަމާނުލައި ތަރައްގީ ކުރެވޭކަން މި ސަރުކާރުން ދައްކައިދީފާނެތީ އެކަމާއި ގަންނަ ބިރުން ކަމަށް އައްޑު މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.
އިދިކޮޅު ކޯލިޝަނުން ތަކުރާރުކޮށް ގޮވަމުން ދަނީ އެމްޑީޕީ ސަރުކާރުން އިންޑިއާއަށް ރާއްޖެ ވިއްކާލަން އުޅޭ ކަމަށާއި، ރާއްޖޭގައި އެގައުމުގެ ސިފައިން ބާރުވެރިކަން ހޯދަމުން ދާކަމަށެވެ. އަދި އައްޑޫގައި އިމާރާތް ކުރަމުންދާ މަރުކަޒަކީ އިންޑިއާގެ ސިފައިންގެ މިލިޓަރީ ބޭސް އަކަށް ހަދަމުންދާ ތަނެއްކަމަށްވެސް އިދިކޮޅު ފަރާތްތަކުން ދަނީ ބުނަމުންނެވެ.
މިކަމަށް ރައްދު ދެއްވާ ރޮޒައިނާ ވިދާޅުވީ އިންޑިއާގެ ހިލޭ އެހީގެ ދަށުން އައްޑޫގައި ގާއިމް ކުރަނީ ޕޮލިސް އެކަޑަމީއެއް ކަމަށާއި އެއީ އެއްވެސް ގައުމެއްގެ މިލިޓަރީ ބޭސްއެއް ނޫން ކަމަށެވެ. އެތަނުގެ މަސައްކަތްތައް ނިމުމާއެކު ދިވެހި ސަރުކާރާ ހަވާލު ކުރެވޭނެ ކަމަށާއި އެތަނުގެ ސަބަބުން އައްޑޫގެ އިގްތިސޯދު ވަރަށް ބޮޑަށް ފުޅާވެގެންދާނެ ކަމަށްވެސް ރޮޒައިނާ ވިދާޅުވިއެވެ.
މީގެ އިތުރުން އެކަމަނާ ވިދާޅުވީ، އިދިކޮޅު ފަރާތްތަކުން މަސައްކަތް ކުރަނީ ވަރަށް ބޮޑަށް އޮޅުވާލުމަށް ކަމަށާއި އެފަރާތްތަކުން މަސައްކަތް ކުރަނީ ދޮގުތަކެއް ހަދައިގެން އިންޑިއާ ސަރުކާރާ ދިވެހި ރައްޔިތުން ޖެއްސުމަށް ކަމަށެވެ.
”ހަގީގަތުގައި އެމަސައްކަތް ކުރާ ބޭނުމެއްވެސް އަޅުގަނޑުމެންނަށް އޮޅިގެނެއް ނޫޅެން. ހަގީގަތުގައި ވެގެން މިއުޅޭ ގޮތަކީ މިހާރު އިންޑިއާއެކު މި ކުރާ މަސައްކަތްތަކުން މި ފަސް އަހަރު ދުވަހުގެ ތެރޭގައި ރާއްޖެއަށް ލިބިގެންދާނެ ތަރައްގީއާ ހެދި މިބޭފުޅުން ބިރު ގަންނަނީ. މި ތަރައްގީ ފެނިގެން ދިޔައީމަ މިބޭފުޅުންނަށް ދެން ވެރިކަމަށް އައުމުގެ ފުރުސަތު ނުލިބިދާނެތީ ބިރު ގަންނަނީ. ވައްކަމާނުލައި ތަރައްގީ ކުރެވޭކަން ދައްކައިދީފާނެތީ އެކަމުގެ ބިރު މި ބޭފުޅުންނަށް ހީވެގެން އިންޑިއާއާ ރައްޔިތުންނާ ޖައްސައިގެން މިކަންކަން ކުރެވުނަ ނުދޭން ވެގެން މިއުޅެނީ،“ ރޮޒައިނާ ވިދާޅުވިއެވެ.
މީގެ އިތުރުން އިދިކޮޅު ފަރާތްތަކުން މިދިޔަ ހުކުރު ދުވަހު ބޭއވި އެއްވުމުގައި އެޗްޕީއޭގެ އެންގުންތަކާއި ހިލާފުވެފައި ވާކަމަށް ބުނެ ކުރީގެ ރައީސް ޑރ. މުހައްމަދު ވަހީދު ހަސަންމަނިކަށްވެސް އެކަމަނާ ވަނީ ފާޑު ވިދާޅުވެފައެވެ. އެކަމަނާ ވިދާޅުވީ، ސިއްހީ ނިޒާމަށް ގެއްލުންވާނޭ ގޮތަކަށް އަމަލުތައް ބެހެއްޓުމުން ދޭހަވަނީ އެމަނިކުފާނުގެ ގައުމީ ވަންތަކަން ނެތް ކަމަށާއި ރައްޔިތުންނާމެދު ނުވިސްނަވާކަން ކަމަށެވެ.
