އެއްވެސް މީޑިއާއަކުން ފިތުނަ ފަސާދަ އުފެއްދުމަކީ ބަލައިގަނެވޭނެކަމެއް ނޫންކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވެފައި މިވަނީ ޗެނަލް 13 އިން ގެނެސްދިން ލައިވް ޕްރޮގުރާމެއްގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙްގެ ހަށިކޮޅުގައި އަލިފާން ރޯކޮށްލަން ގޮވައިލާފައިވަނިކޮށް އެ ކަން ކުށްވެރިކޮށް ސޯޝަލް މީޑިއާގައި ގިނަ ބަޔަކު ފާޑުކިޔަމުން އަންނަ ދަނޑިވަޅެއްގައެވެ.
މި ގޮތުން ބައެއް ފަރާތްތަކުން ބުނާގޮތުގައި ޗެނަލް 13 އަކީ އަބަދުވެސް ފިތުނަ ފަސާދަ އުފައްދައި ހަދާ ޗެނަލްއެކެވެ. އެހެންކަމުން އެ ޗެނަލް އުވައިލަންޖެހޭކަމަށާއި އެ ކަމަށް ފިޔަވަޅުއަޅަންޖެހޭކަމަށް ގިނަބަޔަކު އަންނަނީ ބުނަމުންނެވެ.
މި ގޮތުން ރާއްޖެ ހަލަބޮލިވެފައިވާ ދަނޑިވަޅެއްގައި ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވީ
އެއްވެސް މީޑިއާއަކުން ރުޅިވެރިކަމާއި ނަފުރަތާއި ހަސަދައާއި ފިތުނަ ފަސާދަ އުފެއްދުމަކީ އެކަކަށް ވެސް ބަލައިގަނެވޭނެކަމެއް ނޫންކަމަށެވެ. ނަމަވެސް އެއްވެސް މީޑިއާއެއް އުވައިލަން ބުނުމަކީ އެދެވޭގޮތެއް ނޫންކަމަށް ވެސް ރައީސް ނަޝީދު ވިދާޅުވިއެވެ.
މީގެ އިތުރުން ރައީސް ނަޝީދު ވަނީ ރުޅިވެރިކަމާއި ނަފުރަތާއި ހަސަދައާއި ފިތުނަ ފަސާދަ އުފައްދާ ޗެނަލްތައް އަޑުނޭހުމަށް އިލްތިމާސްކުރައްވާފައެވެ.
