ރާއްޖޭގެ ސަރުކާރާއި، ރައްޔިތުންގެ މަޖިލީހުގެ އިތުރުން ކޯޓުތަކުން ކުޅިވަރުގެ ސިޔާސަތު ތަކުގެ ތެރެއަށް ވަދެ ނުފޫޒު ފޯރުވާނަމަ ރާއްޖެ ސަސްޕެންޑު ކޮށްފާނެ ކަމަށާއި، އެހެން ކަމުން ކުޅިވަރުގެ ތެރެއަށް ސިޔާސީ ނުފޫޒު ނުފޯރުވުމަށް ސްޕޯޓްސް މިނިސްޓަރ އަހުމަދު މަހުލޫފު ވިދާޅުވުމުން އެކަމަށް ހެންވޭރު ދެކުނު ދާއިރާގެ މަޖިލީސް މެމްބަރު އަލީ އާޒިމް ރައްދު ދެއްވައިފިއެވެ.
މަހުލޫފު ވިދާޅުވީ ރާއްޖޭގެ ޓީޓީ އެސޯސިއޭޝަންގެ އިންތިހާބުގެ މައްސަލަ ކޯޓަށް ހުށައެޅުމުން ބައިނަލް އަޤްވާމީ ޓީޓީ އެސޯސިއޭޝަނުން ރާއްޖެ ސަސްޕެންޑު ކުރުންގާތް ކަމަށާއި، އެހެން ކަމުން އެކަހަލަ ކަމެއް ނުކުރުމަށް އެދޭކަމަށެވެ. މީގެ އިތުރުން އެފްއޭއެމްގެ އިންތިހާބުގެ މައްސަލަވެސް މަޖިލީހަށް ހުށައެޅުމުން ފީފާ އަދި އޭއެފްސީއިން ވެސް ވަނީ ރާއްޖެ ސަސްޕެންޑު ކުރަން ޖެހިދާނެ ކަމަށް ނިންމާފައެވެ. އެހެން ނަމަވެސް ފަހުން ހުރިހާ އިދާރާއަކުންވެސް އެފްއޭއެމްގެ އިންތިހާބު ސައްހަކަމަށް ނިންމާ ވަނީ އިންތިހާބު ބަލައިގަނެފައެވެ.
މެމްބަރު އާޒިމް މިއަދު ކުރެއްވި ޓުއީޓެއްގައި ވިދާޅުވީ، ބައިނަލްއަގްވާމީ ޖަމިއްޔާތަކުން ރާއްޖެ ސަސްޕެންޑްކޮށްފާނެއޭ ކިޔައިގެން ގާނޫނާ، ގަވާއިދާ އެއްގޮތަށް ނޫޅޭ ފަރާތްތަކާ ދޭތެރޭ ފިޔަވަޅު ނާޅާ ނަމަ މި ހިންގަނީ ދައުލަތެއްތޯ ސުވާލު އުފައްދަވައިފަ އެވެ. އަދި މިގޮތަށް އުސޫލުތަކަށް ބަލާނަމަ، ވައްކަން ކުރުމާއި ފޭރުންވެސް އޯކޭ ވާނެކަމަށްވެސް އާޒިމް ވަނީ ވިދާޅުވެފައެވެ.
ޓީޓީ އިންތިހާބާ ގުޅޭ މައްސަލައެއް، ކޯޓަށް ހުށަހެޅުއްވީ އިންތިހާބުގައި ރައީސްގެ މަގާމަށް ވާދަކުރައްވާ ތޯހާ ސަލީމްގެ ޓީމުގައި ހިމެނޭ ކުރީގެ ކުޅުންތެރިޔާ އަލީ އާދަމް މަނިކު (ތާޅަފިލި އަލިބެ) އެވެ. މަޖިލީހުގެ ހެންވޭރު ހުޅަނގު ދާއިރާގެ އެމްޑީޕީ މެމްބަރު ހަސަން ލަތީފް ވަކާލާތު ކުރެއްވި މައްސަލައިގައި އެ ފަރާތުން އެދުނީ އިންތިހާބު ހުއްޓުވައިދޭން ވަގުތީ އަމުރެއް ނެރެދޭށެވެ. އެކަމަކު ސިވިލް ކޯޓުން ވަނީ އަމުރެއް ނެރެދެވޭނެ ތަނެއް ނެތް ކަމަށް ބުނެފަ އެވެ. އެއާ އެކު މިއަދު ޓީޓީ އިންތިހާބު އޮންނާނެ އެވެ. ތޯހާއާ ވާދަކުރައްވަނީ މިހާރުގެ ރައީސް އަލީ ރަޝީދު (އައްޔަ) އެވެ.
އަލިބެ ބުނީ ކޯޓަށް މައްސަލަ ހުށަހެޅީ، އިންތިހާބަކީ އިންސާފުވެރި ދެފުށް ފެންނަ އިންތިހާބަކަށް ހަދައިދިނުމަށް އެދި ގާނޫނުގައި ބަޔާންކޮށްފައިވާ ރާއްޖޭގެ ކުޅިވަރާ ބެހޭ އެންމެހާ ފަރާތްތަކަށް ހުށަހެޅުމުން އެކަށީގެންވާ ގޮތެއްގައި އެކަންކޮށްދޭން އެތަންތަން އުޒުރުވެރިވެ ދޮރުތައް ބަންދުވުމުން ކަމަށެވެ.
