”ދިވެހިރާއްޖޭގެ ޗާޓަރޑް އެކައުންޓެންޓުންގެ ބިލު“ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ތަޞްދީޤު ކުރައްވައިފިއެވެ.
ރައްޔިތުންގެ މަޖިލީހުން ”ދިވެހިރާއްޖޭގެ ޗާޓަރޑް އެކައުންޓެންޓުންގެ ބިލު“ ފާސްކުރީ އޮގަސްޓު މަހުގެ 26 ވަނަ ދުވަހު ބޭއްވި މި އަހަރުގެ ދެވަނަ ދައުރުގެ 32 ވަނަ ޖަލްސާގައެވެ.
”ދިވެހިރާއްޖޭގެ ޗާޓަރޑް އެކައުންޓެންޓުންގެ ބިލު“ ގައި ބައިނަލްއަޤްވާމީ އުސޫލުތަކާއި ހަމަތަކާއި އެއްގޮތްވާ ގޮތުގެމަތިން އެކައުޓެންސީ ދާއިރާއާއި ގުޅޭ ކަންކަން ތަންޒީމުކުރަން ހަމަޖެހިފައިވެއެވެ. އަދި ރާއްޖޭގައި އެކައުންޓަންސީގެ ޕްރޮފެޝަނެއް ޤާއިމުކޮށް އެ ޕްރޮފެޝަން ކުރިއެރުވުމަށް މަގުފަހިކުރުމަށްޓަކައި ”އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް“ ގެ ނަމުގައި ޤާނޫނީ ޝަޚުސެއް އުފައްދުމަށް ވެސް ބިލުގައި ކަނޑައަޅާފައިވެއެވެ.
އޭގެ އިތުރުން ”އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް“ މެންބަރުންގެ ގިންތިތައް ކަނޑައެޅުމާއި އެކި ގިންތީގެ މެންބަރުންގެ ޝަރުތުތަކާއި، މެންބަރުން ޢަމަލުކުރަންޖެހޭ ސުލޫކީ މިންގަނޑުތަކާއި ހަމަތަކުގެ އިތުރުން އެހެނިހެން ކަންކަމާއި ގުޅޭ އުސޫލުތައް ވެސް ބިލުގައި ކަނޑައަޅާފައިވެއެވެ. އަދި ބިލުގައި ބަޔާންކޮށްފައިވާ މަސްއޫލިއްޔަތުތައް އަދާކުރުމަށްޓަކައި އުފައްދާ އިދާރާއަކީ އަމިއްލަ ނަމުގައި ދަޢުވާކުރުމާއި ދަޢުވާ ލިބިގަތުމުގެ ބާރު ލިބިގެންދާ އިދާރާއެއްކަމަށް ވެސް ބަޔާންކޮށްފައިވެއެވެ.
އޭގެ އިތުރުން އެ އިދާރާއަކީ އަމިއްލަ ނަމުގައި މުޢާމަލާތުކުރުމުގެ ހައިސިއްޔަތު ލިބި, ވަކި ސިއްކައެއް އޮންނަ އިދާރާއެއްކަމަށާއި ޤާނޫނީ ގޮތުން އަމިއްލަ އަދި މިނިވަން މުސްތަޤިއްލު ޝަޚްސެއްކަމަށް ވެސް ބަޔާންކޮށްފައިވެއެވެ.
ހަމައެއާއެކު ”އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް“ ގެ އެސޯސިއޭޓް މެންބަރުންގެ ގޮތުގައި ރަޖިސްޓްރީ ކުރުމުގެ ފުރުސަތު އިންޓަރނޭޝަނަލް ފެޑަރޭޝަން އޮފް އެކައުންޓެންޓްސްގެ މެންބަރުކަން އޮންނަ ޕްރޮފެޝަނަލް އޯގަނައިޒޭޝަނެއްގެ އެސޯސިއޭޓް މެންބަރުންނަށް ލިބިދޭކަމަށް ބިލުގައި ވަނީ ބުނެފައެވެ.
މީގެ އިތުރުން ޤާނޫނަށް ޢަމަލުކުރަން ފަށާއިރު އެސޯސިއޭޓް މެންބަރެއްގެ ކިބައިގައި ހުންނަންޖެހޭ ޝަރުތުތައް ފުރިހަމަވެފައިވާ ފަރާތްތަކުގެތެރެއިން އެކައުންޓެންޓެއްގެ ގޮތުގައި މަދުވެގެން 05 އަހަރު ދުވަހު މަސައްކަތްކޮށްފައިވާ ފަރާތްތަކަށް ”ފެލޯ“ މެންބަރުންނަށް ވުމުގެ ފުރުސަތު ފަހިވެގެންދާނެ ކަމަށް ވެސް ބިލުގައި ބުނެއެވެ.
ޗާޓަރޑް އެކައުންޓެންޓުންގެ ބިލު ޤާނޫނަކަށްވެ ޢަމަލުކުރަން ފެށުމުން ރާއްޖޭގައި އޮޑިޓުކުރުމާއި އެޝޫރެންސްގެ ޚިދުމަތްދިނުމުގެ މަސައްކަތްކުރާ ފަރާތްތަކަށް ހުއްދަ ދިނުމުގެ އިތުރުން ގިންތިކުރުމާއި މެންބަރުން ރަޖިސްޓަރީކުރުމުގެ އެންމެހައި ކަންކަންކުރުމުގެ ބާރު އެ އިދާރާއަށް ލިބިގެންދާނެއެވެ.
ހަމައެއާއެކު ރާއްޖޭގައި ޤާނޫނީ އޮޑިޓުކުރުމާއި އެޝޫރެންސްގެ ޚިދުމަތް ދިނުމަށް ހުއްދަ ދޫކުރުމާއި ގިންތިކުރުމުގައި ދަޢުލަތުގެ މުއައްސަސާތަކުން ކުރަމުންއައި މަސައްކަތް އިންސްޓިޓިއުޓަށް ބަދަލުވެގެންދާނެކަމަށް ވެސް ބިލުގައި ވަނީ ބުނެފައެވެ.
