ދުނިޔޭގެ ތަރިކައިގެ ދާއިމީ ލިސްޓުގައި 06 މިސްކިތްތެއް ހިމެނުމަށް ބޭނުންވާ ނޮމިނޭޝަން ޑޮޒިއަރ 2022 ގައި ޔުނެސްކޯއަށް ފޮނުވުމުގެ މަސައްކަތް ކުރަމުން އަންނަކަމަށް ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ބުނެފިއެވެ.
ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން މިއަދު ބުނީ 2013 ވަނަ އަހަރުގައި ޔުނެސްކޯގެ ދުނިޔޭގެ ތަރިކައިގެ ވަގުތީ ލިސްޓުގައި ރާއްޖޭގެ ހިރިގަލުގެ 06 މިސްކިތެއް ހިމެނިފައިވާކަމަށެވެ. ނަމަވެސް ދުނިޔޭގެ ތަރިކައިގެ ދާއިމީ ލިސްޓުގައި މި މިސްކިތްތައް ހިމެނުމަށް ބޭނުންވާ ނޮމިނޭޝަން ޑޮޒިއަރ 2022 ގައި ޔުނެސްކޯއަށް ފޮނުވުމުގެ މަސައްކަތް ވޯލްޑް މޮނިއުމެންޓްސް ފަންޑާއި ގުޅިގެން ކުރިއަށްދާކަމަށް ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ބުނެއެވެ.
“ޔުނެސްކޯގެ ދުނިޔޭގެ ތަރިކައިގެ ވަގުތީ ލިސްޓުގައި 2013 ވަނަ އަހަރު ދިވެހިރާއްޖޭގެ 6 ހިރިގަލު މިސްކިތެއް ހިމެނިފައިވޭ. ދާއިމީ ލިސްޓުގައި މި މިސްކިތްތައް ހިމެނުމަށް ބޭނުންވާ ނޮމިނޭޝަން ޑޮޒިއަރ 2022 ގައި ޔުނެސްކޯއަށް ފޮނުވުމުގެ މަސައްކަތް @WorldMonumentsއާ ގުޅިގެން ކުރިއަށް އެބަދޭ.“ (ސަޤާފީ ތަރިކަ ރައްކާތެރިކުރާ ޤައުމީ މަރުކަޒު)
ދުނިޔޭގެ ވަގުތީ ތަރިކައިގެ ލިސްޓުގައި 2013 ވަނަ އަހަރުގައި ހިމެނިފައިވާ މިސްކިތްތަކުގެތެރޭގައި ހއ.އިހަވަންދޫ ހުކުރު މިސްކިތް ހިމެނެއެވެ. އިހަވަންދޫ މިސްކިތްމަގުގައި ހުންނަ 38 ސްކުއެއާ މީޓަރުގެ މި މިސްކިތަކީ 40 މީހުންގެ ޖާގައިގެ މިސްކިތެކެވެ. މި މިސްކިތަކީ މީލާދީން 1701 ވަނަ އަހަރުގެ 16 ޑިސެމްބަރުގައި ސުލްޠާން އިބްރާހީމް މުޒްހިރުއްދީންގެ ރަސްކަމުގައި ބިނާކުރެވުނު މިސްކިތެކެވެ.
ދެން އެ ލިސްޓުގައި ހިމެނޭ ރ.މީދޫ ހުކުރު މިސްކިތަކީ އެ ރަށު ހިތްފަސޭހަ މަގުގައި ހުންނަ 70 ސްކުއެއާ މީޓަރުގެ މިސްކިތެކެވެ. 80 މީހުންގެ ޖާގަ ހިމެނޭ މި މިސްކިތަކީ މީގެ 3 ޤަރުނުކުރިން މީލާދީ ސަނަތުން 1705 ގައި ސުލްޠާން މުޒައްފަރު މުޙައްމަދު ޢިމާދުއްދީންގެ ރަސްކަމުގައި ބިނާކުރެވުނު މިސްކިތެކެވެ. ނަމަވެސް ބަދަލުތަކަކާއެކު 1950 ވަނަ އަހަރުގައި ވަނީ އެ މިސްކިތް މަރާމާތުކުރެވިފައެވެ.
ދެން ލިސްޓުގައި ހިމެނޭ މާލޭ ހުކުރު މިސްކިތަކީ 240 ސްކުއެއާ މީޓަރު ހިމެނޭ މިސްކިތެކެވެ. މި މިސްކިތުގައި 300 މީހުންގެ ޖާގަ ހިމެނެއެވެ. މިހާރު މި ފެންނަ ހުކުރު މިސްކިތަކީ މީލާދީން 1658 ގައި ސުލްޠާން އިބްރާހިމް އިސްކަންދަރު(1 ވަނަ) ރަސްކަމުގައި ބިނާކުރެވުނު މިސްކިތެކެވެ.
ދެން މި ލިސްޓުގައި ހިމެނޭ ލ.އިސްދޫ ބައު މިސްކިތަކީ 75 ސްކުއެއާ މީޓަރު ހިމެނޭ 80 މީހުންގެ ޖާގައިގެ މިސްކިތެކެވެ. މި މިސްކިތް ބިނާކުރެއްވީ މީލާދީން 1701 ގައި ސުލްޠާން މުޙައްމަދު(ދެއްވަދޫ ރަސްގެފާނު) ގެ ރަސްކަމުގައެވެ.
ލިސްޓުގައ ހިމެނޭ އދ.ފެންފުށީ ހުކުރު މިސްކިތަކީ 58 ސްކުއެއާ މީޓަރުގެ މިސްކިތެކެވެ. 60 މީހުންގެ ޖާގައިގެ މި މިސްކިތް ބިނާކުރައްވާފައިވަނީ ވެސް ސުލްޠާން މުޙައްމަދު(ދެއްވަދޫ ރަސްގެފާނު) ގެ ރަސްކަމުގައެވެ.
ލިސްޓުގައި ހިމެނޭ މާލޭ ޢީދު މިސްކިތަކީ މާފަންނު ހަނދުވަރީ ހިނގުމުގެ އިރުމަތީފަޅީގައި ބިނާކުރެވިފައިވާ މިސްކިތެކެވެ. އެވޭލާ ޒަމާނުގައި މުޅިންހެން ޢީދު ނަމާދުކުރަމުންދިޔަ މި މިސްކިތަކީ އައްސުލްޠާން މުޙައްމަދު މުޢީނުއްދީން އިސްކަންދަރު ކުލަސުންދުރަ ކައްތިރި ބޮވަނަ މަހާރަދުންގެ ރަސްކަމުގައި ބިނާކުރެއްވި މިސްކިތެއްކަމަށް ތާރީޚުގައި ބުނެފައިވެއެވެ. މި މިސްކިތުގެ ކައިރީގައި “ކުޑަވެޔޮ“ މި ނަން ކިޔުނު ވެވެއްް ވެސް އޮތްކަމަށް ބުނެވެއެވެ.
