ވަޒީރުކަމަށް ޢައްޔަންކުރެއްވީ ވެސް އަދި އެ މަޤާމުން ވަކިކުރައްވާނީ ވެސް ރައީސް އިބްރާހިމް މުޙައްމަދު ޞާލިޙްކަމަށް އިކޮނޮމިކް މިނިސްޓަރު ފައްޔާޒު އިސްމާޢީލް ވިދާޅުވެއްޖެއެވެ.
މިހާރު ނޫހުން ރިޕޯޓުކޮށްފައިވާ ގޮތުގައި ފައްޔާޒު މިއަދު ވިދާޅުވީ ވަޒީރުކަމަށް ޢައްޔަންކުރެއްވީ ވެސް އަދި އެ މަޤާމުން ވަކިކުރައްވާނީ ވެސް ރައީސް އިބްރާހިމް މުޙައްމަދު ޞާލިޙްކަމަށާއި އެ މަނިކުފާނުގެ “ލޮލުން ވިޔަސް އެކަހަލަ އިޝާރާތެއް އަޔަސް“ މަޤާމުން އިސްތިއުފާ ދެއްވަން ތައްޔާރަށް ހުންނެވިކަމަށެވެ.
ފައްޔާޒު މިހެން ވިދާޅުވީ ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު އެދިވަޑައިގަންނަވާފައިވާ ގޮތަށް ވަޒީރުކަމުގެ މަޤާމުން އިސްތިއުފާދެއްވާނަންތޯ ސުވާލުކުރެއްވުމުން ދެއްވި ޖަވާބުގައެވެ. ވަޒީރުކަމުން ފައްޔާޒު ބޭރުކުރުމުގެ މަސައްކަތްތައް ރައީސް ނަޝީދު ކުރައްވަމުން އަންނައިރު އެ މަނިކުފާނު މިހާރު ވަނީ އެމްޑީޕީގެ ޗެއަރޕާސަމް ޙަސަން ލަޠީފަށް ސިޓީއެއްފޮނުއްވައި ފައްޔާޒު އަމިއްލަފުޅަށް މަޤާމުން އެއްކިބާވެވަޑައިގަތުމަށް ދަންނަވާފައެވެ.
މިކަމާއި ގުޅިގެން ފައްޔާޒު ވިދާޅުވީ ރައީސް ނަޝީދު ޙަސަން ލަޠީފަށް ފޮނުއްވެވި ސިޓީގައިވާ ދެކަމަކަށް ކޮމެންޓްކޮށްލަން ބޭނުންފުޅުވާކަމަށާއި އެއްކަމަކީ ސިޓީގައި ރައީސް ނަޝީދު އެދިވަޑައިގަންނަވާފައިވާ ގޮތަށް އެ ސިޓީ ރާއްޖޭގެ ރައްޔިތުންނަށް ފެންނަން ބޭނުންފުޅުވާކަމަށެވެ. އަދި ދެވަނަކަމަކަށް ރައީސް އިބްރާހިމް މުޙައްމަދު ޞާލިޙް ލޮލުން ވިޔަސް އެކަހަލަ އިޝާރާތެއް ކޮށްލެއްވުމުން މަޤާމުން އިސްތިއުފާ ދެއްވަން ތައްޔާރަށް ހުންނެވިކަމަށް ފައްޔާޒް ވިދާޅުވިއެވެ.
ރައީސް ނަޝީދު ފޮނުއްވި ސިޓީގައިވަނީ އެ މަނިކުފާނަކާއި އެއްވެސް ވަޒީރަކާއި ޒާތީކަމެއްނެތްކަމަށާއި އެމްޑީޕީއާއި އެންމެ ދުރު އެއްޗަކީ ކޮރަޕްޝަންގެ ތުހުމަތުތައްކަމަށާއި އެ މަނިކުފާނުގެ ވެރިކަމުގެ 03 އަހަރު ނިމުނުއިރު އެންމެ ނުދައްކާ ވާހަކައަކީ ކޮރަޕްޝަންގެ ވާހަކަކަމަށް ވިދާޅުވެފައެވެ. މި ގޮތުން ފައްޔާޒު މަޤާމުން ދުރުކުރުމަށް މަސައްކަތްކުރައްވަނީ އެމްޑީޕީގެ ކުރިމަގަށްޓަކައި ކަމަށް ވެސް ރައީސް ނަޝީދު ވަނީ ވިދާޅުވެފައެވެ.
