ކްރިމިނަލް ކޯޓު ހިންގެވުން އެ ކޯޓުގެ ފަނޑިޔާރު އަލްއުސްތާޛު އާދަމް މުޙައްމަދާއި ހަވާލުކުރެއްވީ އުސޫލުތަކާއި ޚިލާފަށްކަމަށް ބުނެ މީޑިއާގައި ބައެއް ފަރާތްތަކުން ދައްކާ ވާހަކަތަކަކީ ޚަޤީޤަތާއި ޚިލާފު ވާހަކަތަކެއްކަމަށް ބުނެ ޖޭއެސްސީން އެ ވާހަކަތައް ކުށްވެރިކޮށްފިއެވެ.
ކްރިމިނަލް ކޯޓުގެ ފަނޑިޔާރު އަލްއުސްތާޛް ޢަލީ ރަޝީދު ޙުސެއިން ސްޕްރީމް ކޯޓުގެ ފަނޑިޔާރުކަމުގެ މަޤާމަށް ޢައްޔަން ކުރެއްވުމާއި ގުޅިގެން ކްރިމިނަލް ކޯޓު ހިންގެވުން އެ ކޯޓުގެ ފަނޑިޔާރު އަލްއުސްތާޛު އާދަމް މުޙައްމަދާއި ހަވާލުކުރައްވާފައިވަނީ މި މަހުގެ 08 ވަނަ ދުވަހުގައެވެ. ޖޭއެސްސީން އެ ގޮތަށް ނިންމާފައިވަނީ އެ ދުވަހުގައި ބޭއްވި އެ ކޮމިޝަނުގެ 64 ވަނަ ބައްދަލުވުމުގައެވެ.
ޖޭއެސްސީން މިއަދު ނެރުނު ނޫސްބަޔާނުގައި ބުނީ ކްރިމިނަލް ކޯޓު ހިންގެވުން އެ ކޯޓުގެ ފަނޑިޔާރު އަލްއުސްތާޛު އާދަމް މުޙައްމަދާއި ހަވާލުކުރެއްވީ އުސޫލުތަކާއި ޚިލާފަށްކަމަށް ބުނެ މީޑިއާގައި ބައެއް ފަރާތްތަކުން ދައްކާ ވާހަކަތަކަކީ ޚަޤީޤަތާއި ޚިލާފު ވާހަކަތަކެއްކަމަށެވެ. އަދި ކޯޓެއްގެ އިސް ފަނޑިޔާރަކު ޗުއްޓީގައި ހުރެއްޖެނަމަ ނުވަތަ ދާއިމީ މަސައްކަތެެއްގައި ވީއްލިފައި ހުރެއްޖެނަމަ ނުވަތަ ޙައްޖާއި ޢުމްރާގެ އަޅުކަމުގައިވާނަމަ ނޫންނަމަ ސަލާމުގައި ހުރެއްޖެނަމަ އެ ކޯޓެއް ހިންގެވުން ހަވާލުކުރަންވާނީ އެ ކޯޓެއްގައި ތިބި ފަނޑިޔާރުންގެތެރެއިން އެންމެ ގިނަދުވަސްވީ ފަނޑިޔާރުންގެ ތަރުތީބުންކަމަށް އުސޫލުގައި ބަޔާންކޮށްފައިވާކަމަށް ޖޭއެސްސީން ބުނެއެވެ. އަދި އިސް ފަނޑިޔާރަކު ސަސްޕެންޑްކުރެވޭ ހާލަތްތަކުގައާއި ދާއިމަށް ހުސްވާ ހާލަތްތަކުގައި ވަގުތީ ގޮތުން އެހެން ބޭފުޅަކާއި ހަވާލުކުރާނީ ފަނޑިޔާރުންގެ ޤާނޫނުގެ 18 ވަނަ މާއްދާގެ (ހ) ގައިވާގޮތަށްކަމަށް ވެސް ޖޭއެސްސީގެ ބަޔާނުގައި ބުނެފައިވެއެވެ.
ހަމައެއާއެކު ވަގުތީގޮތުން ކޯޓު ހިންގެވުމަށް ފަނޑިޔާރަކާއި ހަވާލުކުރާނީ ކޯޓުގައި ނުވަތަ ދާއިރާގައި ތިބި ފަނޑިޔާރުންގެ ވަނަވަރާއި ރެކޯޑް ފައިލްތަކުގައި ހުރި ލިޔެކިޔުންތަކަށް ބެލުމަށްފަހު އެ ކޯޓެއްގައި ހިމެނޭ ފަނޑިޔާރުންގެތެރެއިން ތަޢުލީމާއި ތަޖުރިބާއާއި އަޚްލާޤާއި ޤާބިލުކަމަށް ބަލައި އެކަމަށް އެންމެ އެކަށީގެންވާ ފަރާތެއްތޯ ބެލުމަށް ޖޭއެސްސީގެ މެންބަރުންގެ އަޣްލަބިއްޔަތުންކަމަށް ވެސް ކޮމިޝަނުގެ ބަޔާނުގައި ބުނެފައިވެއެވެ.
ޖޭއެސްސީން ވަނީ އެކިއެކި ސުލޫކީ މައްސަލަތައް ސާބިތުވެގެން ފަނޑިޔާރުކަމުން ވަކިކުރުމަށް އެ ކޮމިޝަނުން ރައްޔިތުންގެ މަޖިލީހަށް ލަފާދިނުމުން ފަނޑިޔާރުކަމުން އިސްތިއުފާދިނުމަށްފަހު އެ ކޮމިޝަނުން ޝަރުޢީދާއިރާގެ އިތުބާރު ނެގެހެއްޓުމަށްކުރާ މަސައްކަތާބެހޭގޮތުން ކަންހިނގާގޮތް ޢާންމުންނަށް އޮޅުވައިލުމަށްދައްކާ ވާހަކަތައް ކުށްވެރިކޮށްފައެވެ. އަދި ކޮމިޝަނުގެ މަސްއޫލިއްޔަތު އަދާކުރަމުން އަންނާނީ ޤާނޫނާއި ޤަވާއިދާއި އުސޫލުތަކާއި އެއްގޮތްވާގޮތުގެ މަތިންކަމަށް ވެސް ޖޭއެސްސީން ވަނީ ބުނެފައެވެ.
ކްރިމިނަލް ކޯޓު ހިންގެވުން އަލްއުސްތާޛު އާދަމް މުޙައްމަދާއި ހަވާލުކުރެއްވީ އުސޫލުތަކާއި ޚިލާފަށްކަމަށް ބުނެ ބައެއް ފަރާތްތަކުން ދައްކާ ވާހަކަތަކަކީ ޚަޤީޤަތާއި ޚިލާފު ވާހަކަތަކެއްކަމަށް ބުނެ ޖޭއެސްސީން އެ ވާހަކަތައް ކުށްވެރިކޮށްފައިވާއިރު ކްރިމިނަލް ކޯޓުގެ ކުރީގެ ފަނޑިޔާރު އަޙްމަދު ހައިލަމް ވަނީ އިސް ފަނޑިޔާރުން ކަނޑައެޅުމުގައި ޖޭއެސްސީން ޢަމަލުކުރަނީ އުސޫލާއި ޚިލާފަށްކަމަށް ވިދާޅުވެފައެވެ.
މި ގޮތުން ދިވެހިރާއްޖޭގެ ކޯޓުތަކުގެ ޤާނޫނު(ޤާނޫނު ނަންބަރު 22/2010) 54 ވަނަ މާއްދާގެ (ވ) ގެ ދަށުން ކްރިމިނަލް ކޯޓު ހިންގެވުން އަލްއުސްތާޛު އާދަމް މުޙައްމަދާއި ހަވާލުކުރެއްވިކަން އަންގަވައި ޖޭއެސްސީން ނެރުނު ނޫސްބަޔާން ރީޓްވީޓްކުރައްވާ ރައްދުގައި ހައިލަމް ކުރެއްވި ޓްވީޓުގައި ވަނީ އެ ބަޔާނުގައި ހަވާލާ ދެއްވާފައިވާ މާއްދާއަކީ އިސްފަނޑިޔާރަކު ޢައްޔަންކުރުމުގެ ވާހަކަ ބަޔާންކުރާ މާއްދާއެއްނޫން ކަމަށެވެ. އަދި
ހިންގުން ހަވާލުކުރުމުގައި އެންމެ ގިނަދުވަސްވީ ފަނޑިޔާރަށް އިސްކަންދިނުމަށް އުސޫލު ހެދުމަށްފަހު އެ އުސޫލާއި ޚިލާފަށް ޖޭއެސްސީން ޢަމަލުކުރަމުންދާކަމަށް ވެސް ހައިލަމް ވަނީ ތުހުމަތުކުރައްވާފައެވެ.
މީގެ އިތުރުން ހައިލަމް ކުރެއްވި އެހެން ޓްވީޓެއްގައި ވަނީ ފަނޑިޔާރު އާދަމް މުޙައްމަދަކީ ކްރިމިނަލް ކޯޓުގައި މިވަގުތު ހުންނެވި އެންމެ ޤާބިލު ފަނޑިޔާރުކަމަށް ޤަބޫލުފުޅުކުރައްވާކަމަށް ވެސް ވިދާޅުވެފައެވެ.
ނަމަވެސް ޖޭއެސްސީން ކްރިމިނަލް ކޯޓު ހިންގުން ފަނޑިޔާރު ޢަލީ ރަޝީދާއި ފަނޑިޔާރު އާދަމް މުޙައްމަދާއި ވެސް ހަވާލުކޮށްފައިވަނީ އެ ކޮމިޝަނުން ގެޒެޓްކޮށްފައިވާ އުސޫލާއި ޚިލާފަށްކަމަށް ވެސް ހައިލަމް ވިދާޅުވިއެވެ.
