2003 ވަނަ އަހަރުގެ ސެޕްޓެމްބަރު މަހުގެ 19 ވަނަ ދުވަހު މާފުށީ ޖަލުގައި ހިނގި ހަމަނުޖެހުން ތަކުގައި ގައިދީގެ ގަޔަށް ބަޑިޖަހަން އޭރު ރާއްޖޭގެ ވެރިކަމުގައި ހުންނެވި ކުރީގެ ރައީސް މައުމޫން އަބްދުލް ގައްޔޫމް އަމުރު ކުރައްވާފައި ނުވާ ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ ކުރީގެ މެންބަރު އިބްރާހިމް މުހައްމަދު ދީދީ ވިދާޅުވެއްޖެއެވެ.
އެމަނިކުފާނ މިހެން ވިދާޅުވެފައި މިވަނީ، ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުހައްމަދު ނިހާދު، އެދުވަހު ޖަލުގައި ބަޑި ޖެހުމަށް އަމުރު ކުރެއްވީ ޗީފް އިން ކޮމާންޑަރުގެ އަމުރުފުޅަށް ކަމަށް ތުހުމަތު ކުރައްވައިފައި ވަނިކޮށެވެ. އޭރުގެ ޗީފް އޮފް ކޮމާންޑްއަކީ ރައީސް މައުމޫންއެވެ.
ނިހާދުގެ ވާހަކަތަކަށް ރައްދު ދެއްވާ އިބްރާހިމް ދީދީ ވިދާޅުވީ، ނިހާދު އެހައްދަވަނީ ބުހުތާނު ދޮގު ކަމަށާއި، ރައްޔިތުންގެ މަޖިލީހުގެ މެމްބަރަކަށްވެހުރެ ތިކަހަލަ ދޮގު ހަދަން ނުވާނެ ކަމަށެވެ. މީގެ އިތުރުން ދީދީ ވިދާޅުވީ، އޭރު ނޭޝަނަލް ސެކިއުރިޓީ ސާވިސްގެ އޮފިސަރަކަށް، ކަން ދިމާވި ގޮތުން ހުރީ އެމަނިކުފާނު ކަމަށާއި، ގައިދީންނާއި ދެކޮޅަށް ލީތަލް ހަތިޔާރު ބޭނުން ކުރަނ ރައީސް މައުމޫން އެއްވެސް އަމުރުފުޅެއް ނުކުރައްވާ ކަމަށެވެ.
އީވާން ނަސީމްގެ މަރުގެ ހަނދާނުގައި މަޖިލީހުގެ ރައީސް، ކުރީގެ ރައީސް މުހައްމަދު ނަޝީދު ވެސް ޓުވީޓު ކުރައްވައި ބަހުގެ ހަމަލާތަކެއް ރައްދު ކުރެއްވީ ޒަމާންވީ ވާދަވެރިޔާ، މައުމޫންއަށެވެ. އެމަނިކުފާނު ވިދާޅުވީ އެ ތާރީހަކީ ރައީސް މައުމޫންގެ ”އަނިޔާވެރިކަން“ އިންތިހާއަށް ”ހައްދުން ނައްޓައިގެން“ ގޮސް ރާއްޖެ ބަދަލު ކުރަން ދިވެހިން ނުކުތް ދުވަސް ކަމަށެވެ.
އީވާން ނަސީމްގެ މަރުގެ މައްސަލަ އާއި ޖަލުގައި ގައިދީންތަކަކަށް ބަޑި ޖަހައިގެން މަރާލި މައްސަލަ ތަހުގީގު ކުރަން ރިޔާސީ ކޮމިޝަނެއް ވެސް ރައީސް މައުމޫން އެކުލަވާލެއްވިއެވެ.
