”އިންޑިއާ އައުޓް“ އަކީ އިންޑިއާއާއި ރާއްޖެއާއި ދެ ޤައުމަށް ވެސް އޮތް ކަންބޮޑުވުމެއްކަމަށާއި މި މައްސަލައަކީ އަވަހަށް ހައްލުކުރަންޖެހޭ މައްސަލައެެއްކަމަށް ކުރީގެ ޑިފެންސް މިނިސްޓަރު އަދި މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ.
މިހާރުގެ ހާލަތާމެދު ކަންބޮޑުވުން ފާޅުކުރައްވައި ހޯމަުވަހުގެރޭ އާދަމް ޝަރީފް ވިދާޅުވީ ރާއްޖެ މިއަދު މިވަނީ އެމެރިކާއާއި ޗައިނާގެ އަންނަން އޮތް ކުރިމަތިލުުމުގެ ”ގުޅަކުޅޭ ފަސްގަނޑަށް“ ބަދަލުވެ އެހެން ޤައުމުތަކުގެ ކަޅި ހުއްޓިފައިކަމަށާއި މިހާރު އަދި މި ފެންނަނީ “ޓިޕް އޮފް ދަ އައިސްބަރގް“ ކަމަށެވެ. އަދި އިންޑިއާއަކީ ”ޕްރޮކްސީ“ ކަމަށް ވެސް ވިދާޅުވިއެވެ.
މީގެ އިތުރުން ”އިންޑިއާ އައުޓް“ އަކީ އިންޑިއާއާއި ރާއްޖެއާއި ދެ ޤައުމަށް ވެސް އޮތް ކަންބޮޑުވުމެއްކަމަށާއި މި މައްސަލައަކީ އަވަހަށް ހައްލުކުރަންޖެހޭ މައްސަލައެެއްކަމަށް ވެސް އާދަމް ޝަރީފް ވިދާޅުވިއެވެ. އަދި ހައްލެއްނުގެނެވި ލަސްވެެއްޖެނަމަ ސަރަހައްދީ މައްސަލައަކަށް ބަދަލުވެގެން ހިނގައިދާނެކަމަށް ވެސް އާދަމް ޝަރީފް ވިދާޅުވިއެވެ.
އާދަމް ޝަރީފް ވިދާޅުވީ އިންޑިއާއާއި ރާއްޖެއަކީ އަބަދުވެސް ވަރަށް އެކުވެރި ރަޙްމަތްތެރި ދެ ޤައުމު ކަމަށާއި ނޮވެމްބަރު 03 ގެ ޢުދުވާނީ ހަމަލާއިން ރާއްޖެ ސަލާމަތްކޮށްދިނުންފަދަ އެތައްކަމެއް އިންޑިއާއިން ކޮށްދީފައިވާ ކަމަށެވެ. އަދި ރައްޔިތުންގެ ގިނަ ބަޔަކު އިންޑިއާއާއި މެދު ހިތް ނުތަަވަސްވާންފެށީ މިހާރު ވެރިކަމުގައި ތިބި ބައެއް ފަރާތްތަކުން ރައީސް ޔާމީންގެ ވެރިކަމުގައި އިންޑިއާއަށް ޒިޔާރަތްކޮށް އިންޑިއާއިން ރާއްޖެ ހިފުމަށް ފާޅުގައި ގޮވާލައި އަދި އިންޑިއާގެ ބަޔަކުވެސް އެކަމަށް ވާގިވެރިވާގޮތަށް ވާހަކަދައްކާފައިވަނިކޮށް ކަމަށެވެ.
އޭގެ އިތުރުން 2018 ވަނަ އަހަރުގެ ރިޔާސީ އިންތިޚާބު ވެރިކަންކުރާ ކޯލިޝަނަށް ކާމިޔާބުކޮށްދިނުމުގައި ވެސް އިންޑިއާގެ ބައެއް ފަރާތްތަކުން މަސައްކަތްކޮށްދެއްވިކަމަށް ރައީސް ނަޝީދު ވިދާޅުވުމާއި އިންޑިއާއަކީ ދިވެހި ހުރިހައި ރައްޔިތުންނަށްވުރެ ވަކި ބަޔަކަށް ތާއީދުކުރާ ޤައުމެއްކަމަށް ސިފަކުރެވެން ފެށުމުން ކަމަށް ވެސް އާދަމް ޝަރީފް ވިދާޅުވިއެވެ.
އެހެންކަމުން އިންޑިއާއަކީ ރާއްޖޭގެ ހުރިހައި ރައްޔޮތުންގެ ރަޙްމަތްތެރިއެއްކަމާއި ރާއްޖޭގެ ވަކި ސިޔާސީ ފިކުރެއްގެ ރަޙްމަތްތެރިއެއް ނޫންކަން ސާފުކޮށް ބުނެދޭންޖެހޭކަމަށާއި ދިވެހިން އެކަން ސާފުކުރަންެހޭކަމަށް ވެސް އާދަމް ޝަރީފް ވިދާޅުވިއެވެ. އެހެން ނަމަވެސް ސަރުކާރަކަށް އިތުބާރެއްނެތް ކަމަށްވެސް އާދަމް ޝަރީފް ވިދާޅުވިއެވެ.
އާދަމް ޝަރީފް ވަނީ އިންޑިއާއާއި ރާއްޖެއާއި ދެމެދުގައި ރައްޔިތުންނަށް އިތުބާރުކުރެވޭ ދެފުށް ފެންނަ އަދި ސަރަހައްދުގެ ސަލާމަތާއި ރައްކާތެރިކަމަށް ފައިދާކުރާނެ ހަރުދަނާ ގުޅުމެއް ބާއްވަންޖެހޭކަމަށް ވެސް ވިދާޅުވެފައެވެ.
