ވަޒީރުންގެ މަޖިލީހުގެ މެންބަރުންގެ ލަފާފުޅާއެކު 05 ސަރަހައްދެއް ހިމާޔަތްކުރަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ނިންމަވައިފިއެވެ.
ހިމާޔަތްކުރަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ނިންމަވާފައިވާ 05 ސަރަހައްދަކީ ޅ.މާގަނދު (އެނިމޮނީ) ތިލަ، ޅ.ދިއްފުށި-މާދޫގައި ހިމެނޭ 5 ރަށުގެ ތެރެއިން އެންމެ އުތުރުން އޮންނަ ރަށްކަމަށްވާ ސެއްޅިފުށީގެ ޗަސްބިން ސަރަހައްދާއި ޅ.މާކޯ އާއި ޅ.ވައްވަރާއި ދަނޑިފަޅު ކަނޑު އޮޅިއާއި ދަނޑިފަޅު ފިނޮޅު ސަރަހައްދުގެ އިތުރުން ޅ.ދަށުގިރި ފިނޮޅު ސަރަހައްދެވެ.
މި 05 ސަރަހައްދު ހިމާޔަތްކުރަން ހުށަހެޅުއްވީ އޮންލައިންކޮށް މިއަދު ބޭއްވި ވަޒީރުންގެ މަޖިލީހުގެ ޖަލްސާގައެވެ.
ތިމާވެށީގެ ގޮތުން ޚާއްސަ ސިފަތަކެއް ލިބިގެންވާ މި ސަރަހައްދުތައް ކަނޑައެޅުމުގައި އެންމެ މުހިންމު އެއް އަސާސަކީ ޒަމާނުއްސުރެ މީހުންގެ ފަރާތުން ވާރުތަވަމުން އައިސްފައިވާ މަޢުލޫމާތާއި ލިބެންހުރި ދިރާސާ ރިޕޯޓުތަކާއި މަސްވެރިންނާއި ދަނޑުވެރިންނާއި އަމިއްލަ ޖަމްޢިއްޔާއާއި ޖަމާޢަތްތަކުގެ އިތުރުންް ތިމާވެށީގެ ދާއިރާގެ ތަޖުރިބާކާރުންގެ ފަރާތުން ލިބުނު މަޢުލޫމާތުތައްކަމަށް ރައީސް އޮފީހުން ބުނެފައިވެއެވެ.
މި ބައްދަލުވުމުގައި ވާހަކަދައްކަވަމުން އެންވަޔަރަމަންޓް މިނިސްޓަރު ޑރ.ޙުސެއިން ރަޝީދު ޙަސަން ވިދާޅުވީ މި ސަރަހައްދުތައް ހިމާޔަތްކުރުމަށް ހުށަހެޅީ ކަމާބެހޭ މިނިސްޓްރީތަކާއި އިދާރާތަކުގެ އިތުރުން އެކި ސިނާޢަތްތަކާ މަޝްވަރާކުރެއްވުމަށްފަހުގައި ކަމަށެވެ.
އޭގެ އިތުރުން މިނިސްޓަރު ޑރ.ޙުސެއިން ރަޝީދު ވިދާޅުވީ އެ ސަރަހައްދުތައް ހިމާޔަތްކުރުމުގެ ކަންކަން ކުރިއަށް ގެންދަވާއިރު ޅ.އަތޮޅުގެ އުމްރާނީ ތަރައްޤީއާއި ގުޅޭ މަޝްރޫޢުތަކަށް ހުރަސްނޭޅޭނެ ފަދަ ގޮތަކަށް ކަންކަން ހަމަޖައްސަވާނެ ކަމަށެވެ.
ހަމައެއާއެކު އެ ސަރަހައްދުތައް ހިމާޔަތްކުރުމުން އޭގެ ފައިދާ އަންނަން އޮތް ޖީލުތަކަށް ލިބިގެންދާނެ ކަމަށާއި އެކޯ ޓޫރިޒަމާއި އިންޓަރގްރޭޓެޑް ޓޫރިޒަމާއި ދިރުންހުރި އިޤުތިސާދީ ހަރަކާތްތަކަށް މަގުފަހިވެގެންދާނެކަމަށް ވެސް ޑރ.ޙުސެއިން ރަޝީދު ވަނީ ވިދާޅުވެފައެވެ.
05 ސަރަހައްދެއް ހިމާޔަތްކުރަން ރައީސް ޞާލިޙް މިއަދު ނިންމަވާފައިވާއިރު ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން މީގެކުރިން ވަނީ ޅ.އަތޮޅުގެ ދެ ސަރަހައްދެއް ހިމާޔަތްކޮށްފައެވެ.
މި ގޮތުން މީގެކުރިން ހިމާޔަތްކޮށްފައިވަނީ 1995 ވަނަ އަހަރުގެ ސެޕްޓެމްބަރު މަހުގެ 27 ވަނަ ދުވަހުގައި ޅ.ފުށިފަރު ތިލަ ސަރަހައްދާއި 1999 ވަނަ އަހަރުގެ އޮކްޓޫބަރުމަހުގެ 21 ވަނަ ދުވަހުގައި ހިމާޔަތްކޮށްފައިވާ ޅ.ކުރެއްދޫ ކަނޑު އޮޅި (ކުރެއެދޫ އެކްސްޕްރެސް) ސަރަހައްދެވެ.
