”ރައީސް ޔާމީން ގެއަށް ބަދަލުކުރުމަށް އިންޑިއާގެ އެހިއަށް އެދެނީ“ ކަމަށް ބުނެ، ރާއްޖެ އެމްވީ ގައި ލިޔެ ފަތުރަމުން ގެންދާ ޚަބަރުތަކާއި ޢެ ޚަބަރުގައި ލިޔެފައިވާ ވާހަކަތަކަކީ އެއްވެސް ޙަޤީޤަތެއް ނެތް ދޮގު ވާހަކަތަކެއްކަމަށް އިދިކޮޅު ކޯލިޝަނުން ބުނެފިއެވެ.
ރާއްޖެ އެމްވީ އިން ބުނެފައިވަނީ، ޕީއެންސީގެ ރައީސް އަބްދުއްރަހީމް އަބްދުﷲ ގެ ހުށަހެޅުމަށް، ކުރީގެ ރައީސް ޑރ. މުހައްމަދު ވަހީދު ހަސަން މަނިކު ރައީސް ޔާމީން މިނިވަން ކުރުމަށްޓަކައި މަޝްވަރާ ކުރުމަށް އިންޑިއާ އެންބަސީއަށް ދާން ނިންމެވި ކަމަށާއި، އަދި އެކަމަށް ލީޑަޝިޕުން ތާއީދުކުރި ކަމަށް ވެސް ރާއްޖެއެމްވީ އަށް މައުލޫމާތުދިން ފަރާތަކުން ބުނެފައިވާ ކަމަށެވެ.
އެކަމާއި ގުޅިގެން އިދިކޮޅު ކޯލިޝަނުން މިއަދު ނެރުނު ބަޔާނެއްގައި ބުނެފައިވަނީ، ރައީސް ޔާމީން ގެއަށް ބަދަލުކުރުމަށް އިންޑިއާގެ އެހިއަށް އެދެނީ ކަމަށް ބުނެ، ރާއްޖެ އެމްވީ ގައި ލިޔެ ފަތުރަމުން ގެންދާ ޚަބަރުތަކާއި ޢެ ޚަބަރުގައި ލިޔެފައިވާ ވާހަކަތަކަކީ އެއްވެސް ޙަޤީޤަތެއް ނެތް ދޮގު ވާހަކަތަކެއް ކަމަށާއި، އަދި އެއްވެސް މިންވަރަކަށް ކަމުގެ ޙަޤީޤަތް ހޯދުމެއް ނެތި، ރައީސް ޢަބްދުﷲ ޔާމީން ޢަބްދުލްޤައްޔޫމާއި މި ކޯލީޝަން ގެ އަގު ވައްޓާލާ ސިޔާސީ ފައިދާއެއް ނެގުމަށް ލިޔެފައިވާ ޙަޤީޤަތާއި ޚިލާފު ދޮގު ޚަބަރު އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
މީގެ އިތުރުން، އެ ޚަބަރުގައި ބުނާފަދަ ކޮންފަރަންސް ބައްދަލުވުމެއް މިކޯލިޝަންގެ ލީޑަރޝިޕުން ބާއްވާފައި ނުވާއިރު، ރައީސް ޢަބްދުﷲ ޔާމީން ޢަބްދުލްޤައްޔޫމް މިނިވަން ކުރުމާމެދު އިންޑިއާގެ އެމްބަސީއަށް މަޝްވަރާ ކުރުމަށް ދިއުމާމެދު މިކޯލިޝަންގެ ލީޑަރޝިޕްގެ ތެރޭގައި އެއްވެސް ގޮތަކުން މަޝްވަރާ ކުރެވިފައެއް ނުވާނެކަމަށާއި، ރައީސް ޢަބްދުﷲ ޔާމީން ޢަބްދުލްޤައްޔޫމް މިވަގުތު ޖަލުގައި ހައްޔަރުކުރެވިފައިވަނީ، ޙައްޤު ނޫން ސިޔާސީ ދައުވާއަކުން ކުރެވިފައިވާ ޙުކުމަކުންކަން ދިވެހި އެންމެހާ ރައްޔިތުންނަށް އެނގިވަޑައިގަންނަވާނެ ކަމަށެވެ.
އަދި އެމަނިކުފާނަކީ، މިވަޠަނުގެ ދިފާޢުގައި ކޮންމެފަދަ ޤުރުބާނީއެއްވެސް ވެވަޑައިގަންނަވަން ތައްޔާރަށް ހުންނެވި ވަރަށް ޤައުމީ ބޭފުޅެއްކަންވެސް އެނގިވަޑައިގަންނަވާނެ ކަމަށާއި، އެހެންކަމުން، އެމަނިކުފާނުގެ އަމިއްލަފުޅު މުހުތާދެއް ފުއްދެވުމަށް ޤައުމަށް ޣައްދާރުވެވަޑައެއް ނުގަންނަވާނެ ކަމަށްވެސް ބަޔާނުގައި ވަނީ ބުނެފައެވެ.
ބަޔާނުގައި އިތުރައް ބުނެފައިވަނީ، ސަރުކާރުން ދިވެހި ރައްޔިތުންނަށް ޣައްދާރުވެ، ނާޖާއިޒްގޮތުގައި މަންފާ ހޯދުމަށް ކުރަމުން ގެންދާ މަސައްކަތް ރައްޔިތުންނަށް އޮޅުވާލުމަށްޓަކައި، ރައީސް ޢަބްދުﷲ ޔާމީން ޢަބްދުލްޤައްޔޫމާއި މިކޯލިޝަންގެ އަގުވައްޓާލަން ސަރުކާރާއި ގުޅިގެން ރާއްޖެ އެމްވީ އިން ކުރަމުން ގެންދާ ސިޔާސީ މަސައްކަތްތައް ވަގުތުން ވަގުތަށް ހުއްޓާލުމަށް އެކޯލިޝަނުގެ ފަރާތުން ގޮވާލާ ކަމަށެވެ.
ބަޔާން ނިއްމާލަމުން އެކޯލިޝަނުން ބުނެފައިވަނީ، ނޫސްވެރިކަމުގެ ހުދޫދުގެ ތެރެއިން ޒިންމާދާރު ނޫސްވެރިކަމެއް ކުރުމަށް ގޮވާލާ ކަމަށެވެ.
