ގެއިން ބޭރަށް ނުކުމެގެންދާއިރު މޫނަށާ، ކަންފަތް އަދި ނޭފަތައް އުދަގޫވާ މާސްކެ ގެ ބަދަލުގައި މޫނު ނިވާ ވާގޮތަށް ބޮލުގައި ފޭސް ޝީލްޑް އަޅައިގެން އުޅެން ފަސޭހަ ކަމަކު ފަހުގެ ދިރާސާތަކުން ދައްކާގޮތުގައި މިއީ އެންމެ ބުއްދިވެރި ގޮތް ނޫންކަން ވަނީ ފާހަގަ ކުރެވިފައެވެ.
ޖަޕާނު ސަރުކާރުން ޚަރަދުކޮށްގެން ކޮށްފައިވާ ދިރާސާއަކުން ދައްކާ ގޮތުގައި 100 އިންސައްތައަށް 5 މައިކްރޯ މީޓަރަށް ވުރެ ކުދި ”ޕާރޓިކަލްސް“ މީހާގެ މޫނާއި ޝީލްޑް އާއި ދެމެދުން ނުކުމެގެން ދެއެވެ. އަދި އޭގެ ދެބައިކުޅަ އެއްބައި އިންސައްތައަށް 50 މައިކްރޯ މީޓަރުގެ ”ޕާރޓިކަލްސް“ ވެސް ވައިގެ ތެރެއަށް ދެއެވެ. ޝީލްޑުން ހިފަހައްޓައިދެނީ ހަމައެކަނި 50 މައިކްރޯ މީޓަރަށްވުރެ ބޮޑެތި ”ޕާރޓިކަލްސް“ ކަން ވަނީ ބަޔާންކޮށްފައެވެ.
މި ދިރާސާ ހިންގާފައިވާ މަރުކަޒު ކަމުގައިވާ ”ރިކެންސް ސެންޓަރ ފޯ ކޮމްޕިއުޓޭޝަނަލް ސައިންސް“ އިން ”ދަ ގާރޑިއަން“ އަށް މަޢުލޫމާތު ދިނުމުގައި ދިރާސާ ކޮމިޓީގެ ލީޑަރ މަކޮތޯ ޓްސުބޮކުރާ ބުނާގުތުގައި، ކޮވިޑް ޖެހިފައިވާ މީހެއްގެ ފަރާތުން ނުކުމެގެންދާ ”ޕާޓިކަލްސް“ ފޭސް ޝީލްޑް އެޅުމަކުން، ކައިރީގަ ތިބޭ މީހުން ރައްކާތެރިކޮށެއް ނުދެއެވެ. އެއީ މާސްކް އާ ޚިލާފަށް ޝީލްޑް އިން މި ބުނާ ”ޕާރޓިކަލްސް“ ބޭރުވެގެންދާތީއެވެ.
ހަމަ މިފަދައިން، ”ފިޒިކްސް އޮފް ޕްލުއިޑްސް“ ކިޔާ ޖޯނަލް އެއްގައި ޕަބްލިޝް ކޮށްފައިވާ ގޮތުން ކެއްސާ ކިބިހި އަޅާއިރު ބޭރުވާ ”ޕާޓިކަލްސް“ ކުރިމަތީގައި ހުންނަމީހާއަށް ބޮލޮކް ކުރުމުގައި ފޭސް ޝީލްޑް މަސައްކަތް ކުރިކަމުގައިވިޔަސް ދެ ކޮޅުން ފަސޭހައިން މި މައިކްރޮސްކޯޕިކް ތަކެތި ފެތުރިގެން ދެއެވެ.
އިންޑިޔާގެ އެތެރަ ހަށީގެ މަޝްހޫރު ޑޮކްޓަރެއް ކަމުގައިވާ ޑރ. ޓުޝާރް ރޭން ބުނާ ގޮތުގައި ”….. ހާމަ ތަނެއްގައި ފޭސް ޝީލްޑްއިން ރައްކާތެރިކަން ފޯރުކޮށްދިން ކަމުގައިވީ ނަމަވެސް، މީހުން ގިނަވާ ތަންތަނާއި ހެލްތް ކެއަރ ފެސިލިޓީސް ކަހަލަ ބަލި ފެތުރުމަށް ފަސޭހަވާ ތަންތަނުގައި ހަމައެކަނި ފޭސް ޝީލްޑް ބޭނުންކުރުމަކީ އެހާ ބުއްދިވެރި ކަމެއްކަމުގައި ނުފެނޭ. އެހެނަސް، ރަގަނޅަށް ނޭފަތާއި އަގަ ބަންދުވާފަދަ ފޭސް މާސްކް، N95 މާސްކް ނުވަތަ ސާޖިކަލް މާސްކް ބޭނުން ކުރުމުން އެފަދަ މާޙައުލުގައި ރައްކާތެރިކަން ލިބޭނެ. ކޮންމެ ކަމުގެއްގައިވެސް އެންމެ ރައްކާތެރިކަމުގެ ފިޔަވަޅު އަޅައި، މާސްކް އެޅުމުގައިވެސް އެހާ ގިނައިން އަތްލާ، ނަގާ އެޅުމުން ދުރުހެލިވުން އެންމެ ރަނގަޅީ. ވައިރަސް އިން ރައްކާތެރިކަމަށް ފޭސް ޝީލްޑްއަށް ވުރެ މާސްކް ބޭނުންކުރުން މުހިއްމު..“
ގިނަ ފަރާތްތަކުން އާއްމުކޮށް ފޭސް މާސްކްގެ ބަދަލުގައި ޕްލާސްޓިކް ޝީލްޑް ބޭނުން ކުރަމުންދަނީ، އޭގެ ފަސޭހަ ކަމާއެކު، އެއިން މީހާގެ މޫނު ފެނުމާއި، މުޖުތަމަޢުގައި އުޅޭއިރު އެކަކު އަނެކަކާ މުޢާމަލާތް ކުރުމުގައި މީހާގެ އިހްސާސްތައް ދައްކުވައިދެނީ މޫނުމަތިން ކަމަށްވާތީ އެ ބޭނުމުގައެވެ. އަދި ފޮޓޯ ނެގުމާއި އެފަދަ އެހެނިހެން ސޯޝަލް މީޑިއާއާ ގުޅުން ހުރި ކަންކަމުގައި، ދެއްކުންތެރި ކަމުގެ ނިޔަތުގައިވެސްމެއެވެ. އެހެނަސް، މުޅިދުނިޔެއަށް ދިމާވެފައިވާ މި ބޮޑު ވައިރަހުން ސަލާމަތް ވުމަށް މިއީ އެންމެ ރައްކާތެރި ގޮތް ނޫންކަމުގައި ދެނެގަންނާށެވެ.
