އެކްސިޑެންޓްގައި ލިބުނު އަނިޔާތަކަށް ފަރުވާދެމުން ދަނިކޮށް ނިޔާވި ޢާއިޝަތު ނަޒްރާ(ނަޒޫ) އިން ސައިކަލް އެކްސިޑެންޓްވީ މީހަކު ފޮށުމުން އެނބުރި ފަހަތަށް ބަލައިލި ހިނދުކަމަށް ނަޒޫގެ ލޯބިވެރިޔާ ބުނެފިއެވެ.
މި މަހުގެ 27 ވަނަ ދުވަހުގެރޭ ހިނގި މި އެކްސިޑެންޓްވީ ބާރަށް ދުއްވާފައިދަނިކޮށް ނޫންކަމަށް، ނަޒޫއާއެކު ދެ އަހަރު ހޭދަކުރި ލޯބިވެރިޔާ އާޒިފް ޢަބްދުލްޙަކީމާއި ހަވާލާދީ މިހާރު ނޫހުގައި ރިޕޯޓުކޮށްފައިވެއެވެ.
އެކްސިޑެންޓް ހިނގަން މެދުވެރިވީ ދުއްވާފައި ދަނިކޮށް އެތަނުގައި ހުރި މީހަކު ނަޒޫއާއި ފޮށުނީމަ ފަހަތަށް ބަލަން ހަދައިގެން ދަރުމަވަންތަ ހޮސްޕިޓަލު ކުރިމަތިން ޕޭމަންޓުގައި ޖެހި ކަހައިލުމުގެ ސަބަބުންކަމަށް އާޒިފް މިހާރަށް ކިޔައިދީފައިވެއެވެ.
އެހެންނަމަވެސް ފުލުހުން ބުނީ އެކްސިޑެންޓުވީ ބާރު ސްޕީޑްގައި އަމީނީ މަގުން ދަރުމަވަންތަ ހޮސްޕިޓަލާއި ދިމާ ބޮޑުތަކުރުފާނުމަގަށް ނިކުތް ސައިކަލެއް ކޮންޓްރޯލްނުވެ ގޮސް ދުވާ ޓްރެކް މައްޗަށް އަރައިގެން ކަމަށެވެ.
ސައިކަލް ވެއްޓުމާއެކު ތެދުވެ ބަލައިލިއިރު ނަޒޫ އޮތީ މަގުގެ މޫދާވީކޮޅުގައި ކަސްރަތަށް ހަދާފައި އޮތް ޓްރެކްމަތީގައި ކަމަށާއި, އެ ވަގުތު ނަޒޫގެ ނޭފަތުންނާއި ކަންފަތުން ލޭ އަންނަކަމަށް ވެސް އާޒިފް ބުނެފައިވާކަމަށް މިހާރުގައި ރިޕޯޓުކޮށްފައިވެއެވެ. އަދި އެ ތަނުން ނަޒޫ ނަގަން އެހީތެރިވެދިނީ ދަރުމަވަންތަ ހޮސްޕިޓަލުގެ ޕޮލިސް ޕޯސްޓުގައި އިން އަންހެން ފުލުހެއްކަމަށާއި، ބިންމަތިން ނެގިއިރު އަނގައިންލޭ އަންނަކަމަށާއި، އޭރު ހޭހުރިކަމަށް ވެސް އާޒިފް ބުނެފައިވެއެވެ.
އެކްސިޑެންޓްގައި ސިކުނޑިއަށް ލިބުނު ގެއްލުން ބޮޑުކަމުން އައިޖީއެމްއެޗުގައި ފަރުވާދެވެން ނެތުމާއެކު ނަޒޫ ގެންދިޔައީ އޭޑީކޭ ހޮސްޕިޓަލަށެވެ. މި ގޮތުން ނަޒޫ ނިޔާވެފައިވަނީ މިއަދު ފަތިހު އޭޑީކޭ ހޮސްޕިޓަލުގައެވެ. ވެންޓިލޭޓަރުގައި ފަރުވާދެމުން އަންނަނިކޮށް ނަޒޫ ނިޔާވީ ހިތްހުއްޓިގެންކަމަށް އޭނާގެ ޢާއިލާއިން ވަނީ ބުނެފައެވެ.
ޓިކްޓޮކްގައި މަޝްހޫރު ފަންނާނެއްކަމަށްވާ ނަޒޫއަށް ޓިކްޓޮކްގައި ފޮލޯކުރާ މީހުންގެ ޢަދަދު 17000 އަށް އަރާއިރު، ނަޒްރާގެ ބައެއް ވީޑިއޯތައް ބަލާފައިވާ މީހުންގެ ޢަދަދު ލައްކައާއި ގާތަށް އަރައެވެ. ނަޒޫ ނިޔާވުމާއެކު މީސްމީޑިއާގެ އެކި މަންސަތަކުގައި އޭނާގެ ފޭނުން އަންނަނީ ހިތާމަ ފާޅުކުރަމުންނެވެ.
