ކ.ތުލުސްދޫ ކައުންސިލް އިދާރާއިން، އިސްލާމްދީނަށް ފުރައްސާރަކޮށް ރިޕޯޓު ލިޔުނު އެމް.ޑީ.އެން ގެ މީހުން އިންސާފުގެ ކުރިމައްޗަށް ގެނައުން އަވަސް ކުރުމަށް ގޮވާލާ ބަޔާނެއް ނެރެފިއެވެ.
”މި ބަޔާނުގައި ވަނީ ޕްރިލިމިނަރީ އެސެސްމެންޓް އޮފް ރެޑިކަލައިޒޭޝަން އިން ދަ މޯލްޑިވްސް“ ގެ ނަމުގައި ނެރެފައިވާ ރިޕޯޓެއްގައި އިސްލާމްދީނަށް ފުރައްސާރަކޮށްފައިވާކަން ފުލުހުންގެ ތަހްޤީގަށް ސާބިތުވެ އަދި އެކަމާ ދެކޮޅަށް ރާއްޖޭގެ އެތައް ރައްޔިތުންނަކާއި ކައުންސިލްތަކަކުން އަޑު އުފުލުމުގެ ސަބަބުން 19 ޑިސެމްބަރު 2019 ވަނަ ދުވަހު ދިވެހިރާއްޖޭގެ މަދަނީ ޖަމްޢިއްޔާތަކުގެ ޤާނޫނުގެ 19 ވަނަ މާއްދާގެ (ހ) އާއި (ށ) އާ ހަވާލާދީ އެ ޤާނޫނުގެ 32 ވަނަ މާއްދާގެ ދަށުން އެ ރިޕޯޓު ނެރުނު މަދަނީ ޖަމްޢިއްޔާކަމަށްވާ އެމް.ޑީ.އެން އުވާލާފައިވާކަމަށެވެ.
އެފަދަ ޖަމްޢިއްޔާއެއް އުވާލުމަކީ ސަރުކާރުން ކޮންމެހެން ކުރަންޖެހޭނެ ކަމެއް ކަމުގައި ބަޔާނުގައިވެއެވެ. އަދި އެއީ މުސްލިމުންނަށް އެކަމުން އުފާވެރިކަން ގެނެސްދީ، އެ ޖަމްޢިއްޔާ އުވާލުމަށް ގޮވާލެއްވި ކައުންސިލެއްގެ ހައިޝިއްޔަތުން އެ ކައުންސިލްވެސް އުފާކުރާކަމެއްގެ ގޮތުގައި ބަޔާނުގައި ވެއެވެ.
މީގެ އިތުރުން އެ ބަޔާނުގައި ހަމައެކަނި އެ ޖަމްޢިއްޔާގެ ނަން މަދަނީ ޖަމްޢިއްޔާތަކުގެ ދަފްތަރުން އުނިކޮށްފައި ފުއްދާލުމަކީ ރައްޔިތުން ބޭނުންވާ ގޮތެއްނޫން ކަމުގައާއި، އެއާއި ޙިލާފަށް އެ ރިޕޯޓު ލިޔުމުގައި ޝާމިލުވި އެންމެހާ ފަރާތްތަކާީ، އެމް.ޑީ.އެންގެ އިސްވެރިން އަދުލު އިންސާފުގެ ކުރިމައްޗަށް ގެނެސް އަދަބު ދިނުމަކީ ލާޒިމު ކަމެއް ކަމުގައި ބުނެފައިވެއެވެ. އަދި މިއީ ދިވެހިރާއްޖެގެ ދީން ހިމާޔަތް ކުރުމުގެ ދަށުން ކޮންމެހެން ކުރަންޖެހޭނެ ކަމެއް ކަމުގައި އެ ކަައުންސިލުން ޤަބޫލުކުރާކަމެއް ކަމުގައިވެސް ބަޔާންވެފައިވެއެވެ.
އެ ބަޔާނުގައި ވަނީ އިސްލާމްދީނާ މެދު ނަފްރަތްތެރިކުރުވުމަށް ދޮފު މަޢުލޫމާތު ފެތުރި އެންމެހާ ފަރާތްތަކަށް ނުކޮށް ޤާނޫނީ ފިޔަވަޅު އެޅުމަށް ގޮވާލާފައެވެ،
އަދި އެ ޖަމްޢިއްޔާގެ ހަރަކާތްތައް ހުއްޓުވާލާ މަނާކުރިތާ ހަމަސް ދުވަސްވާން ކައިރިވެފައިވާއިރުވެސް އެ ރިޕޯޓު ލިޔުން ފަރާތްތަކަށް ދަޢުވާ ކޮށްފައިނުވާކަމީ ތުލުސްދޫގެ ރައްޔިތުން ނުހަނު ކަންބޮޑުވެެ، އެންމެ ހަރުކަށި ޢިބާރާތުން ކުއްވެރި ކުރާ ކަމެއްކަމުގައިވެސް ބުނެފައެވެ.
