މުޅި ދުނިޔެ ކޮރޯނާ ވައިރަހުގެ ބަލިމަޑު ކަމާއި ހަނގުރާމަ ކުރަމުން ދާއިރު އެންމެ ބޮޑެތި އަދި މުއްސަނދި ޤައުމުތަކުން ވެސް ދަނީ މި ވައިރަހާ ދެކޮޅަށް ކުރާ ހަނގުރާމާގައި ނާކާމިޔާބު ވަމުންނެވެ. އެގޮތުން މުޅި ދުނިޔޭގެ މައްޗަށް ކުރި ހޯދާފައިވާ، އަދި މާލީ ގޮތުންނާއި އިޤްތިޞާދީ ގޮތުންވެސް އެންމެ ކުރިއަރާފައިވާ އެއް ޤައުމު ކަމަށްވާ އެމެރިކާ ގައި މި ބަލި ކޮންޓްރޯލް ނުވެ ދުވަހަކަށް ވުރެ ދުވަހެއް ދަނީ ހާލަތު ބޮޑު ވަމުންނެވެ. މިއާއެކު ދުނިޔޭގެ ދެ ވަނަ އަށް އާބާދީ އެންމެ ބޮޑު އެއް ޤައުމު ކަމަށްވާ އިންޑިއާ ގައިވެސް މި ބަލި ފެތުރޭލެއް އަވަސްވެ މަރުވާ މީހުންގެ އަދަދު އެތައް ގުނަ އަކަށް ދަނީ އިތުރުވަމުންނެވެ.
އިޤްތިޞާދީ ގޮތުން ކުރި އަރާފައިވާ ޤައުމު ތަކުގެ ޙާލަތު ދުވަހަކަށް ވުރެ ދުވަހެއް ގޯސް ވަމުން ދާއިރު އިޤްތިޞާދު ހީނަރުވެފައިވާ ޤަޢުމު ތަކުގެ ޙާލަތާމެދު އަޅުގަނޑުމެން ވިސްނާލަން ޖެހެއެވެ.
އެގޮތުން މި ޕެންޑެމިކް ގެ ސަބަބުން އެންމެ ބޮޑަށް އަސަރު ކުރަމުންދާ އެއް ޤައުމަކީ ޔަމަން އެވެ. 2015 ވަނަ އަހަރުއްސުރެ ޔަމަންގައި ހިނގަމުންދާ ދާޚިލީ ހަނގުރާމައިގެ ސަބަބުން އެ ޤައުމުގެ އިޤްތިޞާދު ވަނީ މުޅިން ފުނޑުފުނޑު ވެފައެވެ. އެގޮތުން މުޅި ދުނިޔެ މިހާތަނައް ދެކިފައިވާ އެންމެ ބޮޑު އިންސާނީ ކާރިސާ ގެ ސަބަބުން އެންމެ ބޮޑު ގެއްލުމެއް ލިބެމުންދަނީ ޔަމަން ގެ ކުޑަކުދިންނަށާއި އަންހެނުންނަށެވެ.
ޔަމަނުގައި ކޯވިޑް19 ހަލުވި ކަމާއެކު ފެތުރެމުން ދިއުމާއެކު ކުރިން އޮތް ނުރައްކާތެރި ދަނޑިވަޅު އިތުރަށް ގޯސްވެ މުޅި ޤައުމުދަނީ ބަނޑުހައި ހޫނު ކަމާއި ހަނގުރާމަ ކުރަމުންނެވެ. އެގޮތުން ސާފު ބޯފެން ނުލިބި އެންމެ ޒަރޫރީ ބޭނުންތައް ނުފުދި ޤައުމުގެ ހާލަތު ދުވަހަކަށް ވުރެ ދުވަހެއް ގޯސްވެ، އިސް ސަފުގައި މަސައްކަތް ކުރަމުންދާ ސިއްހީ ޚިދްމަތްތެރިން އެއްވެސް އުޖޫރަ އަކާ ނުލާ މަސައްކަތް ކުރަން ވަނީ މަޖުބޫރު ވެފައެވެ. މީގެ ތެރެއިން 10.2 މިލިއަން ކުދިންނަކީ އެންމެ ޒަރޫރީ ސިއްޚީ ޚިދުމަތް ތަކުންވެސް މަޚްރޫމް ވެފައިވާ ކުދިންނެވެ. އެތަކެއް މިލިއަން ކުދިން ތަޢުލީމު އުނގެނުމުން މަޚްރޫމް ވެފައިވާއިރު، މި ބަލިމަޑު ކަމާއި ގުޅިގެން ސްކޫލް ތައް ބަންދުކޮށް ކިޔަވައި ދިނުންވަނީ އެއްކޮށް ހުއްޓާލެވިފައެވެ.
މި ކާރިސާގެ ސަބަބުން ޔަމަންގެ ކުޑަކުދިންގެ މުސްތަޤްބަލް ވަނީ މުޅިން ބަނަވެފައެވެ. ދިރާސާ ތަކުން ދައްކާގޮތުގައި ކުރިއަށް އޮތް 6 މަސް ތެރޭގައި 30،000 ވުރެ ގިނަ ކުޑަކުދިން ބަނޑުހައިހޫނުކަމުގެ ސަބަބުން މަރުވެދާނެ ކަމަށް ލަފާކުރެވެއެވެ.
