ކަރަންޓާއި ފެނުގެ ޙިދުމަތަކީ ރާއްޖޭގައި އެންމެ ފުރިހަމަ ފުރިހަމަ ގޮތެއްގައި ހަގީގަތުގައި ދެވިގެންދާނެ އެއް ޚިދުމަތެވެ. ކަނޑުގެ ސަރަހައްދު ބޯޑުގައުމަކަށްވެފައި ރާއްޖެއަކީ ހޫނު މޫސުމެއް އޮންނަ ގައުމަކަށް ވުމުން އަވިން ކަރަންޓުގެ ޚިދުމަތް ރާއްޖޭގައި ގާއިމްކުރުމަކީ މާކަ އުނދަގޫ ކަމަކަށް ނުވާނެއެވެ. ނަމަވެސް ފާއިތުވެ ދުވަސްތަކަކީ ކަރަންޓު ބިލުތައް ބޮޑުވެ އެކަމާއި ގުޅިގެން ރައްޔިތުން އެތަކެއް ޝަކުވާތަކެއް ކޮށް އަދި ސަރުކާރުން ހައްލުކޮށްދެއްވަން ވެސް ވިދާޅުވެފައިވާ އެއް މައްސަލައެވެ.
ރާއްޖޭގައި ކަރަންޓުގެ ޙިދުމަތްދޭތާ 70އަހަރު ވެފައިވާއިރުވެސް ކަރަންޓުގެ އަގަށް ރަނގަޅު އެދެވޭ މާ ބޮޑު ހައްލެއް އަދި މިހާތަނަށް ލިބިފައެއްނުވެއެވެ. މި ސަރުކާރުން ވަނީ ކަރަންޓުގެ އަގު ހެޔޮކޮށްދެއްވައި މާލެއާއި އެހެން ރަށްރަށާއި ދެމެދުގައި ހުރި ތަފާތުތައް ނައްތަވާލައްވާފައިކަމަށް ވެސް ވިދާޅުވެލައްވާފައެވެ. އަދި ތިމާވެއްޓާއި ގުޅުން ހުރި ގޮތަކަށް ކަރަންޓުގެ ޚިދުމަތް ދިނުމުގެ ގޮތުން އަވިން ކަރަންޓު އުފެއްދޭނެ ގޮތްތައް އިންތިޒާމުކޮށް ހަމަޖައްސަވައިދެއްވާނެ ކަމަށް ވެސް ރައީސުލް ޖުމްހޫރިއްޔާވަނީ ވިދާޅުވެއްލާފައެވެ.
ނަމަވެސް މިހާތަނަށް އަދި ރައްޖޭގައި އެފަދަ މަޝްރޫއެއް ހިންގަވައި ކުރިއަށް ގެންގޮސްފައެއް ނުވެއެވެ. އަބަދުވެސް އިވޭ އަޑަކީ ކަރަންޓުގެ ބިލް ބޮޑުވެ އަތްނުފޯރާ ފަށަށް މައްޗަށްދާކަމުގެ އަޑެވެ. ރައްޔިތުން ކުރާ ހޭދަތައް ކުޑަކުރުމަށް ސަރުކާރުން ގޮވާލައްވާއިރު ރައްޔިތުންގެ އަތުން ނަގާ އަގުތަކާއި ޖިޒީތައް ކުޑަކުރައްވަން ސަރުކާރުން އިސްކަމެއް ދެއްވާތަން ނުފެނެއެވެ.
ކޮރޯނާ ވައިރަސް އާއި ގުޅިގެން ސަރުކާރުން ވަނީ އޭޕްރީލް އަދި މޭމަހުގެ ފެން ބިލުންނާއި 30% ކަރަންޓު ބިލުން 40% ކުޑަކުރައްވައިދޭނެ ކަމަށް ވިދާޅުވެލައްވާފައެވެ. ސްޓެލްކޯ އިން ހާމަކުރެއްވި ގޮތުގައި40 އިންސައްތަ ބިލުގެ ޖުމުލައިން ޑިސްކައުންޓް ލިބޭނަމަ 1000 ރުފިޔާގެ ބިލަކުން 400 ރުފިޔާ އުނިވެ 600 ރުފިޔާއަށް ކުޑަވެގެންދާނެކަމަށާއި 2000 ރުފިޔާގެ ބިލަކުން 800 ރުފިޔާ ކުޑަވެ 1200 ރުފޔާއަށް ކުޑަވެގެންދާނެކަމަށެވެ. އަދި މި ބަދަލުތައް އެ ކުންފުނީގެ ވެބް ސައިޓްއިން ފެނިގެން ދާނެކަމަށް ވެސް ސްޓެލްކޯ އިންވަނީ ހާމަކުރައްވާފައެވެ.
ނަމަވެސް ގިނަ ބައަކު ބުނަނީ މިފަދަ ބަދަލެއް، ނުވަތަ މިފަދަ ބަދަލަކާއި ގާތްކުރާ ވަރުގެ ބަދަލެއްވެސް ބިލުން ނުފެންނަ ކަމަށާއި ބިލުގެ އަދަދުތައް ހުރީ ހަމަ މިދިއަ އަހަރުގެ މިދުވަސްވަރުގެ ބިލްތަކާއިވެސް އެއްވަރަށް ކަމަށެވެ. އަދި ޑިސްކައުންޓް ދިނުމުން ކުރީ މަހުގެ ބިލާއި އެއްވެސް ތަފާތެއްވެސް ނުފެންނަ ކަމަށެވެ.
ކަރަންޓުގެ އަގު މިހާ މައްޗަށް ދާން ޖެހޭނެ ވަކި ސަބަބެއް ނެތެވެ. ދުނިޔޭގެ ތެލުގެ ބާޒާރުގައި އަގު ހެޔޮކޮށް ތެޔޮ ލިބެންއެބަހުއްޓެވެ. އެހެން ކަމުން މިފަދަ ނާޒުކު ފައްތަރެއްގައި އިގްތިސާދު އޮއްވާ ރައްޔިތުންގެ ޖީބަށް ލުޔެއް ހޯއްދަވައި ނުދެއްވެން ވީ ކީއްވެތޯއެވެ؟ ސަރުކާރަށް ވަންނަ އާމްދަނީ އިތުރުކުރަނީ ރައްޔިތުން އަތުން ނަގާ ޓެކްސް އިން ކަމުގައިވާއިރު މިފަދަ ކަންތައްތައް ސަރުކާރުން ރައްޔިތުންނަށް އެންމެ ފުރިހަމަ މައުލޫމާތާއެކު ސާފުކޮށްދެއްވަން ޖެހިލައްވާނެއެވެ. ތަނެއްގައި ފެންނަން އޮންނާނެއޭ ވިދާޅުވެފައިވީނަމަވެސް ބިލަކުން މިކަން އެނގޭކަށް ނެތެވެ. މިއަހަރުގެ ޖެނުއަރީ މަހުގައި ވެސް ވަނީ ބ.އަތޮޅު ކަމަދޫ ގެ ކަރަންޓު ބިލްތަކުން ނަގާވަރަށްވުރެ އިތުރަށް ނަގާފައިވާކަމަށްބުނެ އެރަށުގެ ރައްޔިތުންތަކެއް މައްސަލަ ޖައްސި އަޑުތަކެއްވެސް އިވިގެންގޮސްފައެވެ.
ސަރުކާރުން ވެ ވަޑައިގެންނެވި ގިނަ ވައުދުފުޅުތަކާއި އެއްގޮތަށް އެއްވެސް ކަމެއް މިހާތަނަށް ރަނގަޅަކަށް ކޮށްދެވިފައެއްނެތެވެ. އެގޮތުން ކަރަންޓާއި ފެން ވެސް ރައްޔިތުންނަށް މިވަނީ އަތްނުފޯރާ ހިސާބަށް މައްޗަށް ގޮސްފައެވެ.
