އެޗްޕީއޭގެ މިންގަނޑުތަކަށް ފުރިހަމައަށް އަމަލުކުރާ އެއްހާހެއްހާ ތަން ފާހަގަކުރެވިފައިވާކަމަށް މާލެ ސިޓީ ކައުންސިލުން ވިދާޅުވެއްޖެއެވެ.
މާލެ ސިޓީ ކައުންސިލުން ވިދާޅުވީ މި ތަންތަން ފާހަގަ ކުރެވިފައިވަނީ ޢާންމުން އެއްވެ އުޅޭ ތަންތަނުގައި ކޯވިޑް-19ގެ ޙާލަތުގައި އަޅަންޖެހޭ ފިޔަވަޅުތައް އަޅާފައިވާ މިންވަރު ބެލުމަށް ކުރިއަށްގެންދިޔަ ބޮޑު އިންސްޕެކްޝަންގައި ކަމަށެވެ.މި އިންސްޕެކްޝަން ކުރިއަށް ގެންގިސްފައިވަނީ މިމަހުގެ 12 ވަނަ ދުވަހުއެވެ.
މިކަމުގެ މަޢުލޫމާތު ހިއްސާ ކުރައްވަމުން މާލެ ސިޓީގެ ޑެޕިއުޓީ މޭޔަރ ޝަމާޢު ޝަރީފް ވިދާޅުވީ، މި އިންސްޕެކްޝަންގައި ބަލާފައިވަނީ، މާލެ ސަރަހައްދުގައި ހިންގާ ކާބޯތަކެތި ވިއްކާ ތަންތަނާއި، ފިހާރަތަކާއި، ކެފޭ ރެސްޓޯރެންޓްތަކާއި ޖިމްތަކާއި، ސެލޫންތަކާއި މާރުކޭޓްތައްކަމަށެވެ.މި އިންސްޕެކްޝަނަކީ އެޗްޕީއޭއާއި އެމްއެފްޑީއޭއާއި އިކޮނޮމިކް މިނިސްޓްރީއާއި މާލެ ސިޓީ ކައުންސިލާއި ވެމްކޯއާއި މޯލްޑިވްސް ޕޮލިސް ސަރވިސްއާއި އެމްއާރްސީ އަދި އެޗްޑީސީ ގުޅިގެން ކުރިއަށްގެންދާ އިންސްޕެކްޝަނެކެވެ.މާލެ ސިޓީގެ ޑެޕިއުޓީ މޭޔަރ ޝަމާޢު ޝަރީފު ވިދާޅުވީ ސްޓިކަރ ދީފައިވާނީ އެބޭފުޅުންނަށް ފާހަގަވި ބައެއް ކަންކަމަށް ބަލާއިރު އެންމެ ރަނގަޅު އަދި މީޑިއަމް ލެވެލްއަށް ކަމަށެވެ.
ފިހާރަތަކުގައި ތިބޭ މީހުންނަށް ކޯވިޑާއި ގުޅޭ މަޢުލޫމާތު އެންމެ ރަނގަޅަށް ނޭނގޭކަންވެސް މި އިންސްޕެކްޝަނުން ފާހަގަ ވެގެންދިޔަ ކަމަށް ޑެޕިއުޓީ މޭޔަރ ވިދާޅުވިއެވެ. އަދި ތަންތަން މިންކޮށް ސްޓިކަރ ދިންކަމުގައި ވީނަމަވެސް، އާންމުން މިފަދަ ތަންތަނަށްގޮސް ހަރަކާތްތެރިވުމުގައި ސަމާލުވާންޖެހޭކަމަށާއި އެގޮތުން ފަރުދީ ޒިންމާ އިސްކުރަންޖެހޭނެކަމުގައި ޝަމާޢުގެ ވާހަކަފުޅުގައި ވިދާޅުވިއެވެ.
”އަޅުގަނޑު ދޫކޮއްލާނީ މިކަން ފަރުދީ ޒިންމާއަށް. އާންމުނަށްވެސް ތަންތަން ބަލާލީމަ އިނގޭނެ ހާލަތު. ސްޓިކަރ އެބަދެން. އެކަމަކު ސްޓިކަރއަށްވުރެ އާންމުން ވަޒަންކޮށް ފަރުދީ ޒިންމާ ނަގަންޖެހޭނީ. ފިހާރައަކަށް ވަނަސް ނުވަތަ އެހެންތަނަކަށް ދިޔަނަމަވެސް“ ޑެޕިއުޓީ މޭޔަރ ޝަމާޢު ޝަރީފު ވިދާޅުވިއެވެ.
ޝަމާޢު އިތުރަށް ވިދާޅުވީ މި އިންސްޕެކްޝަންގައި ތަންތަން ހިންގުމަށް ނަގަންޖެހޭ ހުއްދަ ނަގާފައި އޮތްތޯ ބެލުމާއި، އެޗްޕީއޭގެ ޤަވާޢިދުތަކަށް ޚިދުމަތުގެ ފެންވަރު ދެވޭތޯ ބަލާފައިވާނެކަމަށާއި އެގޮތުން މި އިންސްޕެކްޝަންގައި މިހާތަނަށް މާލެ ހުޅުމާލެ ވިލިމާލެ އަދި ތިލަފުށީގެ 1475 ތަނެއް ބަލާފައިވާއިރު މިތަންތަނުގެ ހާލަތު މިންކުރެވިފައިވާކަމަށެވެ.
ހަމައެއާއިއެކު 44 އިންސްޕެކްޓަރުން ހަރަކާތްތެރިވި މި އިންސްޕެކްޝަންގައި އެޗްޕީއޭގެ ގަވައިދުތަކަށް ފުރިހަމައަށް ތަބާވެފައިވާ އެއްހާހެއްހަތަން ފާހަގަކުރެވުފައިވާކަމަށް ޝަމާއު ވިދާޅުވިއެވެ.
