ހުޅުމާލެ ރެހެންދީ ސުކޫލުގައި ތައުލީމު ހާސިލްކުރަމުންދާ 2 ދަރިވަރަކާއި އެސުކޫލްގެ މުދައްރިސަކު ކޮވިޑް-19އަށް ޕޮސިޓިވް ވެއްޖެއެވެ.
މިނޫހަށް މައުލޫމާތު ލިބިފައިވާ ގޮތުގައި އެސުކޫލުން ކޮވިޑް-19އަށް ޕޮޒިޓިވްވެފައިވަނީ ގްރޭޑް 9 އަދި 10 ގައި ތައުލީމު ހާސިލް ކުރަމުންދާ ދެ ދަރިވަރުންނެވެ.
މައުލޫމާތު ލިބިފައިވާ ގޮތުގައި މި ދެ ދަރިވަރުންނާއި، ޓީޗަރުވެސް ޕޮސިޓިވްވެފައިވަނީ ސުކޫލްއަށް ހާޒިރުވަމުން ދަނިކޮށެވެ.
މީގެ ކުރިން ވަނީ ސްކޫލެއްގެ ސީނިއާ މެނޭޖްމެންޓުގެ މުވައްޒަފަކު ކޮވިޑް-19 އަށް ޕޮޒިޓިވްވެފައެވެ. އެގޮތުން އޭރު ޕޮސިޓިވް ވެފައިވަނީ ހުރަވީ ސުކޫލްގެ ޕްރިންސިޕް އެވެ.
ކޮވިޑް-19 އާއި ގުޅިގެން ސުކޫލްތައް ބަންދުކޮށްފައި އޮތް އޮތުމަށް ނިމުމެއް ގެނެސް ރައްކާތެރިކަމުގެ ވަރުގަދަ ފިޔަވަޅު ތަކާ އެކު ނިއުނޯމަލްގައި ސްކޫލްތަކުގެ ކިޔެވުން ފަށައިފައިވަނީ މިމަހުގެ ފުރަތަމަވީ ބުދަދުވަހުއެވެ. ކޮވިޑް-19 ނެތް ރަށްރަށުގެ ސްކޫލްތަކުގެ ހުރިހާ ގުރޭޑަކަށް ކިޔަވައިދޭން ފެށި ނަމަވެސް މާލޭގެ ސްކޫލްތައް ހުޅުވައި ކިޔަވައިދެމުންދަނީ ގުރޭޑް 9 އިން މަތީގެ ގުރޭޑް ތަކަށެވެ.
ތައުލީމީ ދާއިރާގައި އުޅުއްވާ ގިނަ ޓީޗަރުން ބުނާ ގޮަތުގައި މިދުވަސްވަރު ސުކޫލްތައް ހުޅުވުން އެއީ އެންމެ ރަނގަޅު ގޮތެއް ނޫނެވެ. އަދި ހާއްސަކޮށް ވެރިރަށް މާލެ ސަރަހައްދެވެ.
“މިކަހަލަ ކޭސްތަކުގައި ސުކޫލުތަކުގައި ހުންނަ ސެކިޔުރިޓީ ކަންކަމާހެދި އެޗްޕީއޭ އިން ޤަބޫލެއް ނުކުރޭ ސުކޫލްތެރޭގައި ޑައިރެކްޓް ކޮންޓެކް ވާނެ ކަމަކަށް. އެކަމަކު މިއީ ކިހާބޮޑު ރިސްކެއްތޯ؟ ނޭގި ނަމަވެސް އެކުދިންއަށް ހުރެދާނެ ތަންތާގައި އަތްލެވިފައިދޯ؟” މިނޫހަށް މައުލޫމާތުދިން ފަރާތަކުން ބުންޏެވެ.
އާއްމު ގޮތެއްގައި، ކޮވިޑް-19 ފެތުރެނީ ކެއްސާ އިރު ނުވަތަ ކިނބިހި އަޅާ އިރު ވައިރަސް ހުރި މީހެއްގެ ހަށިގަނޑުން ބޭރުވާ ޑްރޮޕްލެޓެއް ނުވަތަ ދިޔަތިއްކެއްގެ ޒަރީއާއިންނެވެ. މިފަދަ ދިޔަ ތިއްކެއް އެހެން މީހެއްގެ އަނގަޔަށް ނުވަތަ ނޭފަތަށް ނުވަތަ ލޮލަށް ސީދާ ގޮތެއްގައި ވާސިލު ވެއްޖެނަމަ، އެ މީހެއްގެ ހަށިގަނޑަށް ވައިރަސް އަރައެވެ. މި ގޮތުން ބޭރުވާ ދިޔަ ތިކީގައި ހުންނަ ވައިރަސް، އެ ދިޔަތިކި ގޮސް ހަރުލާ ތަނެއްގައި، މަރު ނުވެ ދެތިން ދުވަހު ހުރެދާނެއެވެ. މި ގޮތަށް ހަރުލާފައި ހުއްޓާ ބަލި ނުޖެހޭ މީހެއްގެ އަތުގައި އެ އެއްޗެއް އުނގުޅި، އުނގުޅުނު އަތް ލޮލޮގައި ނުވަތަ ނޭފަތުގައި ނުވަތަ އަނގައިގައި ހާކާލެވިއްޖެ ނަމަ ވައިރަސް ހަށިގަނޑަށް ވާސިލުވެއެވެ.
ރާއްޖެއިން މިހާތަނަށް ކޮވިޑް-19 އަށް 2831 މީހަކު ޕޮސިޓިވް ވެފައިވާއިރު، އޭގެތެރެއިން 2321 މީހަކުވަނީ ރަނގަޅުވެފައެވެ. އަދި މިބަލީގައި 14 މީހަކުވަނީ ނިޔާވެފައެވެ. ރާއްޖޭގައި ކޮވިޑް-19 އަށް ޓެސްޓުކުރުމަށް މިހާތަނަށް 64،239 ސާމްޕަލް ނަގާފައިވާއިރު، އައިސޮލޭޝަން ފެސިލިޓީގައި 482 ފަރާތެއް އަދި ކަރަންޓީނު ފެސިލިޓީގައި 32 ފަރާތެއް ވާކަމަށް އެޗްޕީއޭ އިން ހާމަކުރެއެވެ.
