އައިލެންޑް އެކްސްޕާޓް ޕްރައިވެޓް ލިމިޑެޓް ކުންފުނީގައި މަސައްކަތް ކުރާ ބިދޭސީ މުވައްޒަފުންތަކެއް މުޒާހަރާކޮށް، ފުލުހުންނާ ކުރިމަތިލައި، ހިނގި ހަމަނުޖެހުންތަކާއި ގުޅިގެން ހައްޔަރު ކުރި ބިދޭސީން ޑީޕޯޓުކޮށްފައިވާ ކަމުގެ މައްސަލަ ފެންމަތިވެއްޖެއެވެ.
މި މައްސަލައިގައި ހައްޔަރު ކުރެވުނު ބަންގްލަދޭޝް ރައްޔިތެއް ކަމަށްވާ އެމްޑީ ރޮނީގެ ގާނޫނީ ވަކީލްގެ ފަރާތުން ވަނީ މައްސަލައާ ގުޅޭގޮތުން ބަޔާނެއްވެސް ނެރެފައެވެ.
މި ބަޔާނުގައި ބުނެފައިވަނީ 14 ޖުލައި 2020 ގައި އޭނާގެ ބަންދަށް ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓުގައި ބޭއްވުނު އޮންލައިން މަޖްލީސްގައި 15 ދުވަހަށް ބަންދުގައި ބެހެއްޓުމަށް އަމުރުކުރެވުނު ކަމަށެވެ.
މި ބަޔާނުގައި ވާގޮތުން އޭނާގެ މުވައްލިކް (އެމްޑީ ރޮނީ) ގެ ފަރާތުން ލިބިފައިވާ މައުލޫމާތަށް އޭނާ ފުރަތަމަ ރާއްޖެ އައުމަށްފަހުވެސް މަސައްކަތް ކުރީ އައިލެންޑް އެކްސްޕަރޓްގައެވެ.
އަދި އޭނާ އަތުން ފައިސާ ނެގިކަމަށާއި ކުންފުނީގެ ފަރާތުން އެނާއަށް ލިބެންޖެހޭ 44000ރ. އާއި ނުލިބިވާ މަސްމަހުގެ މުސާރަ ހުންނާނެ ކަމަށާއި، ހަމަ އެހެން މީހުންނަށް ވެސް މިގޮތަށް ލިބެންޖެހޭ ފައިސާ އެ ކުންފުނީގައި ހުންނާނެ ކަމަށް ބުނެފައިވެއެވެ.
ބަޔާނުގައި ބުނެފައިވާގޮތުން މި މައްސަލަ ކަމާބެހޭ މުއައްސަސާތަކަށް ހުށައެޅުމަށް ޕަވަރ އޮފް އެޓަރނީ ތައްޔާރުކޮށް މުވައްކިލު ލައްވާ ސޮއިކުރުމަށްޓަކައި އޭނާއާ ބައްދަލުކުރުމަށް ޖުލައި މަހުގެ 27 ވަނަ ދުވަހު ފުލުހަށް ހުށައެޅި ނަމަވެސް 25 ޖުލައިގައި އެމްޑީ ރޮނީ އިމިގްރޭޝަންއާއި ހަވާލުކޮށްފައިވާކަމަށް އެ ދުވަހު ކަސްޓޯޑިއަލްގެ ފަރާތުން ވަނީ މަޢުލޫމާތު ދީފައެވެ. ބަޔާނުގައި ބުނެފައިވަނީ އޭނާ އިމިގްރޭޝަންއާއި ހަވާލުކޮށްފައިވަނީ ގާނޫނީ ވަކީލަށް އެނގުމެއް ނެތި ކަމަށާއި މިކަމުން ބެލެވެނީ ހައްޔަރުކުރެވުނު 40 މީހުންވެސް ޑީޕޯޓުކޮށްލަން އުޅޭ ކަމަށެވެ.
މި މައްސަލަ ހިއުމަން ރައިޓްސް ކޮމިޝަނަށް ހުށައެޅުމުން، މިމައްސަލަ ސީރިއަސް މައްސަލައެއްގެ ގޮތުގައި ބަލަމުން އަންނަ ކަމަށާއި އެހެންނަމަވެސް އެފަރާތަތއް އިމިގްރޭޝަންއާއި ހަވާލު ކުޔރި ކަމެއް ނުވަތަ ޑީޕޯޓުކުރިކަމެއް ޔަގީންކަމާއި އެކު ބުނަން ނޭނގޭ ކަމަށް ބަޔާނުގައި ބުނެފައިވެއެވެ.
ހުޅުމާލޭގައި ބިދޭސީންތަކެއް ކުރި މުޒާހަރަ ހަމަނުޖެހުމަކަށް ބަދަލުވެ ގަލާއި އެހެނިހެން އެއްޗެހި އުކުމުގެ ތެރޭގައި ބައެއް ފުލުހުންނަށް ވަނީ އަނިޔާވެފައި ވަނީ މި ހުސްވި ޖުލައި މަހުގެ 13 ވަނަ ދުވަހުއެވެ.
މަޢުލޫމާތު ލިބޭގޮތުގައު މި މުޒާހަރާކޮށްފައިވަނީ 5 މަސް ދުވަސް ވަންދެން މުސާރަނުދީ ހިފަހައްޓާފައިވުމުންނެވެ.
