އަމާންކަން ދެމެހެއްޓުމަށް އިންޑިއާއިން ކޮށްފައިވާ މަސައްކަތްތަކަކީ ދުނިޔެއަށް އުއްމީދު ލިބޭ ކަމެއް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިއަދަކީ އިންޑިއާގެ 74 ވަނަ މިނިވަން ދުވަސް އެގައުމުގައި ފާހަގަކުރާ ދުވަހެވެ. އެކަމާއި ގުޅިގެން ކުރެއްވި ޓްވީޓެއްގައި އިންޑިއާގެ ރައްޔިތުން އަދި ޕްރައިމް މިނިސްޓަރ ނަރެންދްރާމޯދީ އަށް ދުވަހުގެ ތަހުނިޔާ އަރިސްކުރައްވަމުން އިބްރާހިމް މުހައްމަދު ސޯލިހް ވިދާޅުވީ އިންޑިއާއަކީ އަބަދުވެސް އެގައުމުގައި އޮންނަ ޑިމޮކްރެޓިކް އުސޫލުތަކަށް އޮންނަ އަހައްމިޔަތުކަމެއްގެ ސަބަބުން އަދި ދުނިޔޭގެ އެކި ގައުމުތަކަށް ތަރައްގީއަށާއި ދުނިޔޭގައި އަމާންކަން ގާއިމްކޮށް ދެމެހެއްޓުމަށް ކުރަމުން އަންނަ މަސައްކަތްތަކުގެ ސަބަބުން ދުނިޔޭގެ އެހެން ގައުމްތަކަށް އުއްމީދީ ގައުމެއްކަމަށެވެ.
އިންޑިއާއިންވަނީ ރާއްޖޭގެ އުމްރާނީ އަށް ވަރަށް ބޮޑެތި މާލީ އެހީތަކެއް ވެދެއްވާފައެވެ. އެގޮތުން އިންޑިއާ ސަރުކާރުންވަނީ އިއްޔެ ރާއްޖެއަށް 7.7 ބިލިއަންރުފިޔާގެ ޕެކޭޖްތަކެއް ދެއްވަން ނިންމާފައެވެ. އަދި ރާއްޖޭގެ އަސްކަރިއްޔާތަރައްގީ ކުރުމަށް ބޭނުންވާ ތަމްރީން އަދި ޒަމާނީ ވަސީލަތްތައްވެސް އިންޑިއާއިންވަނީ ރާއްޖެއަށް ހަދިޔާކޮށްދެއްވާފައެވެ.
