މަނީ ލޯންޑަރިންގެ ކުށުގައި މާފުށީ ޖަލުގައި 5 އަހަރު ދުވަހުގެ ހުކުމެއް ތަންފީޒު ކުރައްވަމުން ގެންދަވާ ރާއްޖޭގެ ކުރީގެ ރައީސުލް ޖުމްހޫރިއްޔާ އަބްދުﷲ ޔާމީންގެ ވަކީލުންނަށް ކ.އަތޮޅު މާފުއްޓަށް އެރުމުގެ އަމުރެއް ނެރެދިނުމަށް އެދި ހައި ކޯޓަށް މިއަދު މައްސަލައެއް ހުށައަޅާފިއެވެ.
މައްސަލަ ހުށައެޅުއްވުމަށް ފަހު ނުކުމެ ވަޑައިގެން ރައީސް ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ އާދަމް ޝަމީމް ވިދާޅުވީ ރައީސް ޔާމީން އާއި ބައްދަލު ކުރުމަށް މާފުއްޓަށް ވަކީލުން ދިއުމުން އެރަށަށް އެރުމުގެ ހުއްދަ ދެވިފައިނުވާކަމަށާއި، އެހެން ކަމުން ރައީސް ޔާމީން އާއި ބައްދަލު ނުކުރެވުން ކަމަށެވެ. އެރަށަށް ނޭރުނީ އެކަމުގެ ހުއްދަ ރަށު ކައުންސިލުންނާއި އެޗްޕީއޭއިން ދީފައިނުވާތީ ކަމަށްވެސް ޝަމީމް ވަނީ ވިދާޅުވެފައެވެ.
ޝަމީމް އިތުރަށް ވިދާޅުވީ ޖަލުގައި ހުކުމް ތަންފީޒުކުރަމުންދާ އެހެން ގައިދާންނާއި ބައްދަލުކުރެވޭ ކަމަށާއި، އެކަމަށް އެޗްޕީއޭ އަދި ރަށު ކައުންސިލުން ހުއްދަ ހޯދަން ނުޖެހި ހަމަ އެކަނި ރައީސް ޔާމީން އާއި ބައްދަލު ކުރުމަށް ހުއްދަ ހޯދަން ޖެހުމަކީ އެމަނިކުފާނުގެ ހައްގުތަކަށް ސަރުކާރުން އިހުމާލު ވަމުންދާ ކަމުގެ ހެއްކެއް ކަމަށެވެ.
”އަޅުގަނޑު ދެކޭ ގޮތުގައި ގާނޫނީ ވަކީލުންނަށް ބައްދަލު ކުރުމުގެ ފުރުސަތު ރައީސް ޔާމީނަށް ދިނުމަށް ކޯޓުން އަމުރު ކޮށްފައި ވަނީ މުޅި ދައުލަތުގެ މައްޗަށް، ދައުލަތުގެ ކޮންމެ އިދާރާއެއްގެ މައްޗަށް، ކަރެކްޝަންސްއަށް ކައުންސިލްއަށް، އެޗްޕީއޭއަށް ވަކި އަމުރެއް ނެރޭކަށް ނުޖެހޭނެ މުޅި ދައުލަތަށް އަމުރު ކުރީމަ،“ ޝަމީމް ވިދާޅުވިއެވެ.
ކްރިމިނަލް ކޯޓުން ރައީސް ޔާމީންގެ މައްޗަށް ފަސް އަހަރުގެ ޖަލު ހުކުމެއް އިއްވީ އެމްއެމްޕީއާރުސީ ބޮޑު ހިޔާނާތުގެ ފައިސާގެ ތެރެއިން އެއް މިލިއަން ޑޮލަރު އެމަނިކުފާނުގެ އަމިއްލަފުޅު އެކައުންޓަށް ޖަމާކުރެއްވި ކަމަށް ތުހުމަތު ކުރެވޭ މައްސަލައިގައެވެ.
ނަމަވެސް ރައީސް ޔާމީންގެ ސަޕޯޓަރުންނާއި އެމަނިކުފާނު ލީޑް ކުރައްވާ އިދިކޮޅު ޕީޕީއެމާއި ޕީއެންސީގެ ކޯލިޝަނުން ގަބޫލު ކުރަނީ އެމަނިކުފާނުގެ މައްޗަށް އިއްވާފައިވަނީ ނުހައްގު ހުކުމެއް ކަމަށެވެ. މި ސަރުކާރުން އެމްއެމްޕީއާރުސީގެ މައްސަލަ ބަލަމުންދަނީ ވެސް ޔާމީނަށް އަމާޒުކޮށް އެމަނިކުފާނަށް އަނިޔާ ކުރަން ކަމަށް އިދިކޮޅު ކޯލިޝަނުން ބުނެއެވެ.
